O‘zbekistonda 1-martdan boshlab 16 ta litsenziya va ruxsatnoma bekor qilinadi. Bu haqda adliya vaziri matbuot kotibi xabar berdi.
Ma’lum qilinishicha, Adliya vazirligi tomonidan qonunchilikdagi talablar, shu jumladan, litsenziya va ruxsat berish tizimini tartibga solish ta’sirini baholashdan o‘tkazish orqali ishlab chiqilgan “Tadbirkorlik sohasidagi majburiy talablarni qisqartirish hamda litsenziyalash va ruxsat berish tartib-taomillarini soddalashtirish chora-tadbirlari to‘g‘risida”gi prezidenti farmoni qabul qilindi.
Farmon bilan 2024-yil 1-martdan boshlab 16 ta litsenziya va ruxsatnoma bekor qilinmoqda, shu jumladan:
- 7 turdagi ruxsat beruvchi hujjat to‘liq bekor qilinadi. Masalan, bojxona tashuvchilari reyestriga kirishda yuklarni tashish uchun ruxsatnoma talab qilinmaydi;
- 6 turdagi ruxsat beruvchi hujjat birlashtirish yo‘li bilan bekor qilinadi. Xususan, eksport nazorati obyektlarini olib chiqish uchun ruxsatnoma hamda maxsus tovarlar eksporti va importi uchun litsenziya birlashtirilmoqda;
- 3 ta litsenziya va ruxsatnoma xabarnoma tartibiga o‘tkaziladi. Masalan, endilikda turagentlik faoliyati bilan litsenziyasiz shug‘ullanish mumkin bo‘ladi.
Shuningdek, litsenziya yoki ruxsatnomani berishda talabgorlarni video aloqa yordamida masofadan turib baholashga ruxsat etilmoqda.
Chiqish turizmini amalga oshirishda 15 ming dollar miqdoridagi mablag‘ni Xavfsiz turizm jamg‘armasiga zaxira qilib qo‘yish bekor qilinadi.
Bundan tashqari, yuridik shaxslarga tegishli transport vositasini texnik ko‘rikdan o‘tkazish joylarini ixtiyoriy ravishda tanlash mumkin (bugunga qadar texnik ko‘rikdan o‘tkazish ichki ishlar organlari tomonidan belgilangan joylarda o‘tkazilayotgan edi).
Ushbu farmon qabul qilinishi natijasida tadbirkorlarning qariyb 350 milliard so‘mlik xarajatlari tejaladi.
Shavkat Mirziyoyev 8-yanvar kuni aholi bandligini oshirish hamda tadbirkorlik sohasidagi majburiy talablarni qisqartirishga oid takliflar taqdimotida bu borada berilayotgan yengilliklarni tadbirkorlarga yetkazishni topshirgandi. Shuningdek, tadbirkorlar tomonidan taqdim etiladigan hisobotlar bo‘yicha yagona hisobotlar tizimini joriy qilish bo‘yicha topshiriq berdi.
2024-yildan boshlab tadbirkorlar uchun 34 turdagi hisobotlar bekor qilinayotgani, buning natijasida har yili 21 mingdan ortiq tadbirkorning 500 million so‘m xarajati tejalishi ham qayd etildi.
Izoh (0)