Rossiya prezidenti Vladimir Putin “maxsus harbiy operatsiya” vaqtida armiya yoki “harbiy tuzilmalar”da xizmat qilish uchun shartnoma imzolagan xorijliklarga Rossiya fuqaroligini berish to‘g‘risidagi farmonni imzoladi, deb xabar bermoqda “TASS”. Farmon Normativ-huquqiy hujjatlar portalida ham e’lon qilindi.
Shartnoma kamida bir yil muddatga tuzilishi kerak. Harbiy xizmatchilardan tashqari, fuqarolikni ularning oila a’zolari — turmush o‘rtog‘i, bolalari va ota-onalari ham olishi mumkin. Farmon e’lon qilingan kundan e’tiboran kuchga kiradi.
2022-yil sentyabr oyi oxirida Putin harbiy xizmatni o‘tash uchun bir yillik shartnoma tuzgan xorijliklarning soddalashtirilgan tartibda (propiskasiz va Rossiyada besh yil yashashi shartisiz) fuqarolik olishi to‘g‘risidagi farmonni imzolagandi. Ilgari ular buning uchun shartnoma bo‘yicha kamida uch yil harbiy xizmat o‘tashi kerak edi.
2022-yil noyabrda, “qisman” safarbarlik e’lon qilinganidan bir yarim oy o‘tgach, Putin xorijliklarga Rossiya armiyasida Rossiya fuqarolari bilan teng ravishda shartnoma asosida xizmat qilishiga ruxsat beruvchi farmonni imzoladi.
Izoh (0)