Aleksandr Lukashenko rejimi muxolifatchi siyosatchilar Mariya Kolesnikova, Maksim Znak va Belarusda “faqatgina qonun, erkinlik va demokratiyaga chaqirgani sabab” qamoqqa olingan boshqa odamlarning hayoti uchun javobgardir. Bu haqda Germaniya prezidenti Frank-Valter Shtaynmayer siyosiy sabablarga ko‘ra vatanini tark etishga majbur bo‘lgan yoki o‘z qarashlari tufayli hibsga olingan san’atkorlar, muxolifatchilar va boshqa odamlarga bag‘ishlangan Berlindagi nutqida aytib o‘tdi.
“Bugungi kechada biz ketish orqali najot topa olmagan, balki o‘z vatanida ta’qibga uchragan yoki qamoqda o‘tirganlar haqida o‘ylaymiz”, — dedi Germaniya davlat rahbari.
Shtaynmayer Belarusda siyosiy mahbuslar saqlanadigan qamoqxona sharoitlari haqida ham gapirdi.
“Biz qamoqxona sharoitlari oylar davomida yomonlashib, shafqatsizroq bo‘lib borayotganini, mahbuslarga yetarlicha tibbiy yordam ko‘rsatilmayotganini, ular uchun advokat yordamini olish imkoni yo‘qligini, ular bir necha oy davomida tanishlarinini ko‘rmaganini bilamiz”, —dedi u.
“Men Lukashenkoga qat’iy murojaat qilmoqchiman: sizning rejimingiz bu odamlarning hayoti uchun javobgar. Biz ko‘zimizni uzmaymiz. Mariya Kolesnikova, Maksim Znak va boshqalarni unutmaymiz!” — ta’kidladi Shtaynmayer.
Belarusda Mariya Kolesnikovaning ta’qib qilinishi
Germaniyaning Shtutgart shahrida 12 yil yashagan musiqachi Mariya Kolesnikova 2020-yilda Belarusga qaytib ketgandi, u prezidentlik saylovlarida ishtirok etish niyatini e’lon qilgan sobiq bankir Viktor Babariko shtab-kvartirasining koordinatori bo‘lgan. Babariko hibsga olinganidan keyin Kolesnikova “muxolifatchi uchlik”ga qo‘shildi hamda Svetlana Tixanovskaya va Veronika Sepkala bilan birga saylov kampaniyasida qatnashdi.
Kolesnikova 2020-yil sentabr oyida Belarus Jinoyat kodeksining uchta moddasi bo‘yicha ayblanib hibsga olindi: milliy xavfsizlikka zarar yetkazishga qaratilgan harakatlarga ommaviy chaqiriqlar, davlat hokimiyatini konstitutsiyaga zid yo‘llar bilan egallab olish uchun til biriktirish va ekstremistik tuzilma yaratish.
2021-yil sentabr oyida Kolesnikova 11 yilga ozodlikdan mahrum etildi. 2021-yil dekabr oyi oxirida Belarus Oliy sudi yopiq majlisda hukmni o‘z kuchida qoldirdi. May oyida Belarus KGB Kolesnikovani “terrorchilar ro‘yxati”ga kiritdi.
Izoh (0)