Qashqadaryo viloyatida 38 nafar chin yetim va ota-ona qaramog‘idan mahrum bo‘lgan bolalarga yangi uy-joylar topshirildi. Bu haqda “Daryo”ga viloyat hokimligi axborot xizmati rahbari Ahror Sodiqov xabar berdi.
Mas’ulga ko‘ra, bu ishlar prezidentning “Yetim bolalar va ota-ona qaramog‘idan mahrum bo‘lgan bolalarni davlat tomonidan qo‘llab-quvvatlashning yangi tizimini joriy etish chora-tadbirlari to‘g‘risida”gi qarori ijrosini ta’minlashga qaratilgan.
Davlat rahbarining mazkur qarori ijrosini ta’minlash maqsadida Qashqadaryo viloyatida istiqomat qilayotgan 38 nafar ota-ona qaramog‘idan mahrum bo‘lgan bola uy-joy bilan ta’minlandi. Viloyat hokimi Murotjon Azimov ota-ona qaramog‘idan mahrum bo‘lgan bolalar uchun ajratilgan uylar kalitini o‘z egalariga topshirdi, — deydi Ahror Sodiqov.
Yangi yilni o‘zining shaxsiy xonadonida kutib olayotganlardan biri Munisa Toshniyozova prezidentning bu e’tiboridan mamnun ekanini bildirmoqda.
Davlatimiz rahbari bizga shunchalik e’tibor qaratganlarki, qashqadaryolik yoshlarni bir oila deb qarasak, barchamiz oliy ta’lim muassasalarida tahsil olib, uy-joy bilan ta’minlanib kelmoqdamiz. Tan olish kerak, hatto o‘z ota-onangiz ham barcha farzandlariga birdek sharoit yaratib berolmaydi. Prezidentimiz esa barcha ota-ona qaramog‘idan mahrum bo‘lgan bolalarga yaxshi imkoniyatlar tuhfa qilmoqda. Biz bu yaxshiliklarni hech qachon yodimizdan chiqarmaymiz va bu imkoniyatlardan unumli foydalanib, yurtimiz taraqqiyoti yo‘lida dadil qadam tashlaymiz, — deydi u.
Izoh (0)