Қашқадарё вилоятида 38 нафар чин етим ва ота-она қарамоғидан маҳрум бўлган болаларга янги уй-жойлар топширилди. Бу ҳақда “Дарё”га вилоят ҳокимлиги ахборот хизмати раҳбари Аҳрор Содиқов хабар берди.
![](/static/2023/12/24/photo_2023-12-23_18-02-49-K36k8FYL.jpg)
Масъулга кўра, бу ишлар президентнинг “Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғрисида”ги қарори ижросини таъминлашга қаратилган.
Давлат раҳбарининг мазкур қарори ижросини таъминлаш мақсадида Қашқадарё вилоятида истиқомат қилаётган 38 нафар ота-она қарамоғидан маҳрум бўлган бола уй-жой билан таъминланди. Вилоят ҳокими Муротжон Азимов ота-она қарамоғидан маҳрум бўлган болалар учун ажратилган уйлар калитини ўз эгаларига топширди, — дейди Аҳрор Содиқов.
![](/static/2023/12/24/photo_2023-12-23_18-04-28-8sC_6Od4.jpg)
Янги йилни ўзининг шахсий хонадонида кутиб олаётганлардан бири Муниса Тошниёзова президентнинг бу эътиборидан мамнун эканини билдирмоқда.
![](/static/2023/12/24/photo_2023-12-23_18-02-52-hU_PqMd5.jpg)
Давлатимиз раҳбари бизга шунчалик эътибор қаратганларки, қашқадарёлик ёшларни бир оила деб қарасак, барчамиз олий таълим муассасаларида таҳсил олиб, уй-жой билан таъминланиб келмоқдамиз. Тан олиш керак, ҳатто ўз ота-онангиз ҳам барча фарзандларига бирдек шароит яратиб беролмайди. Президентимиз эса барча ота-она қарамоғидан маҳрум бўлган болаларга яхши имкониятлар туҳфа қилмоқда. Биз бу яхшиликларни ҳеч қачон ёдимиздан чиқармаймиз ва бу имкониятлардан унумли фойдаланиб, юртимиз тараққиёти йўлида дадил қадам ташлаймиз, — дейди у.