Исроилнинг 7 октябрдан бери Ғазо секторига берган зарбалари оқибатида ҳалок бўлганлар сони 20 258 кишига етди, 53 688 киши жароҳат олди. Бу ҳақда Ғазо соғлиқни сақлаш вазирлигига таяниб, Al-Jazeera хабар берди.
Маълум қилинишича, сўнгги 24 соат ичида Исроилнинг сектордаги ҳужумлари оқибатида 201 киши ҳалок бўлган, 368 киши жароҳатланган. Вайроналар остида яна минглаб жасадлар қолиб кетгани тахмин қилинмоқда.
“Ҳудуднинг шимолий қисмларини бомбардимон қилиш ва ўққа тутиш давом этмоқда, чунки бу ҳудудларда бир неча кун давом этган жанглардан сўнг чириган жасадлар топилган”, — дейди Al-Jazeera мухбири.
Таъкидланишича, 20 кун давомида вайроналар ва кўчаларда қаровсиз қолган жасадлар 23 декабрь куни Ғазо фуқаролик мудофааси гуруҳи томонидан дафн этилган.
Исроил ва Фаластин ўртасидаги узоқ муддатли можаро шу йилнинг 7 октябрида авж олди. Томонлар шу кунгача зарбалар алмашишда давом этмоқда. Ноябрь ойида Қатар Исроил ва ҲАМАС ўртасида тўрт кунлик сулҳга воситачилик қилганди.
24 ноябрь куни эрталаб ўт очиш тўхтади, шундан сўнг сулҳ икки марта узайтирилди — аввалига икки кунга, кейин яна бир кунга. 1 декабрь куни эрталаб унинг муддати тугади ва жанглар яна давом этди.
БМТнинг фаластинлик қочқинларга ёрдам кўрсатиш агентлиги (UNRWA) бош комиссари Филипп Ладзарини Ғазо яшаш учун яроқсиз бўлиб қолгани ва у ердаги вазият ёмонлашаётганини айтганди.
Изоҳ (0)