O‘zbekistonda ilm-fan, ta’lim va tarbiya, ma’naviyat ustuvor masaladir. Bu haqda Shavkat Mirziyoyev 22-dekabr kuni Respublika Ma’naviyat va ma’rifat kengashining yig‘ilishida qayd etib o‘tdi.
“Yurtimizda ushbu kengash raisi prezident hisoblanadi. Hududlarda esa birinchi rahbarlar bu masala uchun mas’ul etib belgilangan. Chunki ilm-fan, ta’lim va tarbiya, ma’naviyat biz uchun ustuvor masaladir”, — deya uning so‘zlarini keltirdi prezident matbuot kotibi.
Davlat rahbari yig‘ilganlar e’tiborini bu yil ijtimoiy sohaga eng ko‘p — 134 trillion so‘m mablag‘ ajratilgani, bu 2016-yilga solishtirganda 5,6 barobar ko‘pligiga qaratdi.
“Yangi tahrirdagi Konstitutsiyamizda belgilangan “O‘zbekiston – ijtimoiy davlat” degan qoidaning amaliy hayotimizdagi tasdig‘ini birgina ana shu misolda ham yaqqol ko‘rish mumkin. Bu ishlar dastlabki qadamlar bo‘lib, kelgusida yanada kengayib boradi”, — degan Shavkat Mirziyoyev.
Prezidentning ta’kidlashicha, bugun jahon miqyosida taraqqiyot sur’atlari misli ko‘rilmagan darajada shiddatli tus olmoqda. Ayni vaqtda azaliy qadriyatlar, ijtimoiy-siyosiy qarashlar tizimida chuqur transformatsiya jarayonlari yuz bermoqda.
“Ilgari o‘z maqsad va manfaatlarini asosan diplomatiya va siyosat bilan himoya qilib kelgan dunyodagi qudratli markazlar endi ochiqchasiga bosim o‘tkazish, qarama-qarshilik va to‘qnashuvlar yo‘liga o‘tganiga hammamiz guvohmiz. Afsuski, bunday keng ko‘lamli va o‘ta ziddiyatli jarayonlarning ta’siri Markaziy Osiyo mintaqasi va uning tarkibiy qismi bo‘lgan mamlakatimizni ham chetlab o‘tmayapti”, — dedi prezident.
Shavkat Mirziyoyevning aytishicha, ana shunday g‘oyat murakkab va tahlikali vaziyatda O‘zbekistonning milliy manfaatlariga javob beradigan to‘g‘ri yo‘lni topish, albatta, oson bo‘lmayapti.
“Biz dunyodagi uzoq-yaqin barcha davlatlar bilan o‘zaro manfaatli aloqalarni rivojlantirishga harakat qilyapmiz”, — dedi prezident.
Izoh (0)