Ўзбекистонда маданият ва санъат, кутубхона ва музейлар соҳасида ишлаётган ходимлар ойликлари оширилади. Бу ҳақда Шавкат Мирзиёев 22 декабрь куни Республика Маънавият ва маърифат кенгашининг йиғилишида айтиб ўтди.
Йиғилишда мутасаддиларга мусиқа ва санъат мактаблари муаллимларининг ойлигини ошириш, ушбу мактабларнинг коммунал харажатларини бюджетдан қоплаш бўйича чора-тадбирлар ишлаб чиқиш топширилди.
“Умуман олганда, маданият ва санъат, кутубхона ва музейлар соҳасида фаолият олиб бораётган ходимларнинг ойликлари 2024 йил 1 апрелдан 20 фоизга, 2025 йил 1 январдан яна 15 фоизгача бўлган миқдорда оширилади”, — деб ёзмоқда президент матбуот котиби.
Давлат раҳбари маданият ва санъат соҳасида таълим сифатини ошириш бўйича жиддий ўзгариш қилиш шартлигини таъкидлаган.
Шунингдек, нашриёт ва матбаа корхоналарининг молиявий имкониятлари кенгайтирилиши, моддий-техник базаси мустаҳкамланиши зарурлиги қайд этилган. Шу мақсадда ушбу корхоналар 5 йилга солиқлардан озод қилинади. Шунингдек, уларга имтиёзли кредитлар ажратилади.
Президент таржимонликдек масъулиятли меҳнатни муносиб рағбатлантириш учун улуғ шоир ва таржимон Огаҳий номидаги халқаро мукофотни таъсис этишни таклиф этди.
Ҳудудлардаги болалар кутубхоналари босқичма-босқич болажонларнинг севимли масканига айлантирилади.
Изоҳ (0)