Davlat xizmatlarini ko‘rsatishda budjet mablag‘lari talon-toroj qilingani holati bo‘yicha jinoyat ishi qo‘zg‘atildi. Bu haqda Korrupsiyaga qarshi kurashish agentligi axborot xizmati xabar berdi.
Unga ko‘ra, Toshkent shahar adliya boshqarmasi (sobiq Adliya vazirligi huzuridagi davlat xizmatlari agentligining Toshkent shahar boshqarmasi) sobiq mansabdor shaxslari tomonidan davlat xizmatlarini ko‘rsatishda yuridik va jismoniy shaxslardan ortiqcha yoki xatolik tufayli ikki marotaba to‘langan 864 million so‘mlik budjet mablag‘larining talon-toroj qilingani aniqlangan.
Shuningdek, Korrupsiyaga qarshi kurashish agentligi va Davlat xavfsizlik xizmati organlari bilan hamkorlikda o‘tkazilgan o‘rganishda davlat xizmatlaridan kelib tushgan mablag‘larning budjetga va boshqa vazirlik, idoralarning budjetdan tashqari jamg‘armalariga noto‘g‘ri taqsimlangani aniqlandi.
Mazkur holat bo‘yicha to‘plangan hujjatlar prokuratura organlariga yuborildi.