Farg‘onada fuqaroga tegishli Nexia-3 yukxonasidan 14 mln so‘mlik pirotexnika vositalari topildi

Farg‘ona viloyati O‘zbekiston tumanida pirotexnika vositalarining noqonuniy savdosiga chek qo‘yildi, deb xabar beradi viloyat IIB axborot xizmati.

Ma’lum qilinishicha, O‘zbekiston tumani IIB xodimlari tomonidan o‘tkazilgan tezkor tadbir davomida, Beshariq tumani “Xalqlar do‘stligi” MFYda yashovchi A.A. O‘zbekiston tumani markazi hududida Nexia-3 rusumli avtomashina yukxonasidagi pirotexnika vositalarini sotmoqchi ekani aniqlangan. Mashinadagi karobka ichida 1,4 ming quti, jami 70 ming dona, taxminiy qiymati 14 million so‘m bo‘lgan pirotexnika vositalarini qonunga xilof ravishda saqlab kelayotgani aniqlanib, daliliy ashyo tariqasida tuman IIB ixtiyoriga olingan.

Holat yuzasidan fuqaro A.A.ga nisbatan Ma’muriy javobgarlik to‘g‘risidagi kodeksning 185-moddasi prim 1-moddasiga (Pirotexnika buyumlarining qonunga xilof muomalasi) asosan maʼmuriy bayonnoma rasmiylashtirilib, chora ko‘rishlik uchun jinoyat ishlari bo‘yicha O‘zbekiston tumani sudiga yuborilgan.

Avvalroq Namangan viloyati Uychi tumanida 31 million so‘mlik pirotexnika buyumlarini sotayotgan shaxslar ushlangani to‘g‘risida xabar berilgandi. Shuningdek, Angrenda Toshkentga ketayotgan Mercedes-Benz ichidan 250 ming donaga yaqin pirotexnika vositalari topilgan edi.