Hakamga musht tushirgan “Ankaragyujyu” sobiq prezidenti butun umrga futboldan chetlatildi

Turkiya chempionatida hakamning yuziga musht tushirgan “Ankaragyujyu” prezidenti ortiq futbolda ishlamaydi.

Turkiya chempionatining navbatdagi turidan o‘rin olgan “Rizespor”ga qarshi bahs (1:1) o‘z yakuniga yetgach, Faruk Koja maydonga yugurib tushib, bosh hakam Halil Melerning yuziga musht tushirgandi. Hakam yerga yiqilgach, uni bir necha bor tepgan. Shundan so‘ng Koja iste’fo bergandi.

Turkiya futbol federatsiyasi intizom qo‘mitasi Kojani butun umrga futboldan chetlatdi, “Ankaragyujyu”ni esa ushbu voqea uchun 2 million lira (62.800 yevro), yana qo‘shimchasiga muxlislarning xulqi uchun 200 ming lira (6280 yevro) jarimaga tortdi. Shuningdek, klub 5 ta o‘yinning tomoshabinlarsiz o‘tkazadi. 

“Ankaragyujyu” Turkiya chempionatining ortda qolgan 15 turida 18 ochko to‘plab, 11-o‘rinda bormoqda.