Ҳакамга мушт туширган “Анкарагюжю” собиқ президенти бутун умрга футболдан четлатилди

Туркия чемпионатида ҳакамнинг юзига мушт туширган “Анкарагюжю” президенти ортиқ футболда ишламайди.

Туркия чемпионатининг навбатдаги туридан ўрин олган “Ризеспор”га қарши баҳс (1:1) ўз якунига етгач, Фарук Кожа майдонга югуриб тушиб, бош ҳакам Ҳалил Мелернинг юзига мушт туширганди. Ҳакам ерга йиқилгач, уни бир неча бор тепган. Шундан сўнг Кожа истеъфо берганди.

Туркия футбол федерацияси интизом қўмитаси Кожани бутун умрга футболдан четлатди, “Анкарагюжю”ни эса ушбу воқеа учун 2 миллион лира (62.800 евро), яна қўшимчасига мухлисларнинг хулқи учун 200 минг лира (6280 евро) жаримага тортди. Шунингдек, клуб 5 та ўйиннинг томошабинларсиз ўтказади. 

“Анкарагюжю” Туркия чемпионатининг ортда қолган 15 турида 18 очко тўплаб, 11-ўринда бормоқда.