O‘zbekiston aholisining yarmi og‘ir vaznga ega, deb xabar bermoqda Sanitariya-epidemiologik osoyishtalik va jamoat salomatligi qo‘mitasi matbuot xizmati.
Ma’lum qilinishicha, Jahon sog‘liqni saqlash tashkiloti bilan birgalikda O‘zbekistonning 18—64 yoshdagi aholisi o‘rtasida tadqiqot o‘tkazildi.
Tadqiqot natijalarining ko‘rsatishicha:
- har kuni aholining uchdan ikki qismi (67 foiz) yetarli miqdorda (400 grammdan kam) sabzavot va mevalar iste’mol qilmaydi;
- aholining yarmi og‘ir vaznli, 20 foizi semiz;
- 46 foizining qonida xolesterin miqdori oshgan;
- aholining o‘rtacha tuz iste’moli kuniga 14,9 grammni tashkil etadi.
Bu JSST tomonidan tavsiya etilgan miqdordan 3 baravar ko‘p (kuniga 5 grammdan oshmasligi lozim) deganidir.
Qo‘mita xabarida aytilishicha, aholi o‘rtasida sog‘lom turmush tarzini shakllantirish, jismoniy tarbiya va sport bilan shug‘ullanishga jalb etish muhim ahamiyatga ega.
Jismoniy faollik hamda ovqatlanish me’yor va qoidalariga amal qilmaslik, tarkibida tuz, qand, yog‘ miqdori ko‘p bo‘lgan taom va shirinliklarni me’yoridan ortiq iste’mol qilish, shuningdek, yetarli darajada vitamin va minerallar iste’mol qilmaslik yoshlarda ratsional o‘sish va aqliy rivojlanishda ortda qolish, kattalarda esa yurak qon-tomir, endokrin, xavfli o‘sma kabi insonning erta o‘limiga olib keluvchi qator kasalliklarning rivojlanishiga sabab bo‘ladi.
Izoh (0)