Ўзбекистон аҳолисининг ярми оғир вазнли, 20 фоизи семиз ҳисобланади — тадқиқот

Ўзбекистон аҳолисининг ярми оғир вазнга эга, деб хабар бермоқда Санитария-эпидемиологик осойишталик ва жамоат саломатлиги қўмитаси матбуот хизмати.

Маълум қилинишича, Жаҳон соғлиқни сақлаш ташкилоти билан биргаликда Ўзбекистоннинг 18—64 ёшдаги аҳолиси ўртасида тадқиқот ўтказилди.  

Тадқиқот натижаларининг кўрсатишича:

• ҳар куни аҳолининг учдан икки қисми (67 фоиз) етарли миқдорда (400 граммдан кам) сабзавот ва мевалар истеъмол қилмайди;
• аҳолининг ярми оғир вазнли, 20 фоизи семиз;
• 46 фоизининг қонида холестерин миқдори ошган;
• аҳолининг ўртача туз истеъмоли кунига 14,9 граммни ташкил этади.

Бу ЖССТ томонидан тавсия этилган миқдордан 3 баравар кўп (кунига 5 граммдан ошмаслиги лозим) деганидир.

Қўмита хабарида айтилишича, аҳоли ўртасида соғлом турмуш тарзини шакллантириш, жисмоний тарбия ва спорт билан шуғулланишга жалб этиш муҳим аҳамиятга эга.

Жисмоний фаоллик ҳамда овқатланиш меъёр ва қоидаларига амал қилмаслик, таркибида туз, қанд, ёғ миқдори кўп бўлган таом ва ширинликларни меъёридан ортиқ истеъмол қилиш, шунингдек, етарли даражада витамин ва минераллар истеъмол қилмаслик ёшларда рационал ўсиш ва ақлий ривожланишда ортда қолиш, катталарда эса юрак қон-томир, эндокрин, хавфли ўсма каби инсоннинг эрта ўлимига олиб келувчи қатор касалликларнинг ривожланишига сабаб бўлади.