Berlin-Brandenburg oliy maʼmuriy sudi Germaniya federal hukumati tez orada issiqxona gazlarini kamaytirish bo‘yicha favqulodda choralar to‘g‘risida qaror qabul qilishi kerakligi haqida qaror chiqardi. Bu haqda Bild xabar berdi.
Sud bu qarorni Deutsche Umwelthilfe ekologik tashkiloti va BUND ekologik assotsiatsiyasining qo‘shma shikoyatiga javoban qabul qildi. Mas’ul vazirliklar ruxsat etilgan normadagi issiqxona gazlari chegarasidan oshib ketishiga yo‘l qo‘ygani aytilmoqda.
Sud qaroriga ko‘ra, Germaniya federal hukumati 2021 va 2022-yillarda ham amaldagi qonunchilik talablarini buzgan. Masalan, transport vaziri Volker Vissing, majburiy bo‘lgan emissiyalarni kamaytirish dasturini rad etgan. Endi sud federal hukumat 2024 va 2030-yillar oralig‘ida iqlim bo‘yicha maqsadlarga erishish uchun ko‘proq choralar ko‘rishi kerak degan qarorga keldi.
Sud majlisida raislik qiluvchi sudya Arian Xollning tushuntirishicha, hukumat 2023-yil oktyabr oyida havoga chiqindi gazlarning haddan tashqari ko‘pligi sababli iqlim dasturiga o‘zgartirishlar kiritgan. Biroq bu ko‘proq o‘rta va uzoq muddatli hujjat edi.
“Tezkor harakatlar dasturi va iqlim dasturi ikki xil vositadir. Zudlik bilan chora-tadbirlar dasturi keyingi yillarda ularning bajarilishini ta’minlash uchun maqsadlarga erishilmagan taqdirda javob berishga mo‘ljallangan”, — deydi Xoll.
Iqlim maqsadlari o’zgarishsiz qoladi: qonunga ko‘ra, 2030-yilgacha issiqxona gazlari chiqindilari 1990-yil darajasiga nisbatan 65 foizga kamayishi kerak. 2022-yili 40 foiz qisqarishga erishildi.
Izoh (0)