Рамзан Қодировни танқид қилган чечен фаоли ватанига депортация қилинишдан қўрқиб, Қирғизистондан чиқиб кетди

Қирғизистон чегарасини ноқонуний кесиб ўтишда гумонланиб, қўлга олинган россиялик фаол Мансур Мовлаев ўз ватанига мажбуран чиқариб юборилиши мумкинлигидан қўрқиб, республикани тарк этди. Бу ҳақда фаолнинг адвокати Бахит Автандил “Кавказ.Реалии” нашрига маълум қилди.

Адвокатнинг қўшимча қилишича, Мовлаевнинг қаердалиги ҳозирча номаълум, аниқроғи, хавфсизлик нуқтаи назаридан маълум қилинмаяпти.

“У депорт қилинмаслик учун республикани тарк этган. Қандай қилиб, мен билмайман. Айтишимиз мумкинки, у ёлғиз ўзи суд қарорини бажарди ва мустақил равишда Қирғизистон чегарасини тарк этди”, — деди Автандил.

Октябрь ойи бошида Бишкекнинг Первомайский туман суди Мовлаевни Қирғизистон чегарасини ноқонуний кесиб ўтишда айбдор деб топиб, олти ойлик колонияга юбориш, сўнгра депортация қилиш ҳақида ҳукм чиқарганди. Бироқ ҳимоячи фаолга нисбатан максимал жазо тайинланиши учун апелляция ва петисия бериш ниятида эди, чунки адвокатга кўра, маҳкум ўз ватанидан кўра хорижий давлатда хавфсизроқ бўлади.

20 ноябрь куни Бишкек шаҳар суди Мовлаевни ҳибсга олиш муддати тугагани сабаб уни озод қилди. Фаол Қирғизистон ҳудудидаги тергов изоляторида 3 ой ўтирди, бу эса колонияда жазо ўташнинг 6 ойига тенг ҳисобланади — мамлакат қонунчилигига кўра, изолятордаги бир кун жазони ўташ колониясидаги икки кунга тенг.

Шу билан бирга, россияликни Қирғизистондан чиқариб юбориш қарори ўз кучида қолди.

28 ёшли Мансур Мовлаев Чеченистон раҳбари Рамзан Қодировни кескин танқид қилгани, республикадаги инсон ҳуқуқлари бузилиши ва сиёсий репрессияларга қарши чиқишлари билан танилган. 2020 йилда фаол Россия Жиноят кодексининг гиёҳванд моддалар савдоси учун жавобгарликни назарда тутувчи 228-моддасига асосан уч йилга озодликдан маҳрум этилган. Чечен мухолифатчиларига кўра, иш сохта бўлган. 2022 йилда Мовлаев шартли равишда озод қилинди, аммо тез орада ўғирлаб кетилди ва Чеченистон полиция бўлимларидан бирига олиб кетилди. Аммо у ҳужжатларисиз қочиб, Қирғизистонга етиб олишга муваффақ бўлган. Россия уни федерал қидирувга берган.

Мовлаевнинг Марказий Осиё республикасида ҳибсга олингани шу йилнинг август ойи охирида маълум бўлди. Сентябрь ойида фаол Қирғизистон ҳукуматига унга қочқин мақомини беришни сўраб мурожаат қилган.