Uzbekistan Airports boshqaruvi raisining 22-noyabrdagi buyrug‘iga binoan Jasur Po‘latov Islom Karimov nomidagi Toshkent xalqaro aeroporti MCHJ direktori vazifasini bajaruvchisi etib tayinlandi. Bu haqda Uzbekistan Airports matbuot xizmati xabar berdi.
Jasur Po‘latov Plexanov nomidagi Rossiya iqtisodiyot universiteti bitiruvchisi, o‘z faoliyatini aviatsiya sohasida “O‘zbekiston havo yo‘llari” MAKda havo tashuvlarini tashkil etish agenti sifatida boshlagan va mazkur lavozimda 2019-yilgacha ishlab kelgan.
Shundan so‘ng mehnat faoliyatini O‘zbekiston Transport vazirligida davom ettirib, so‘nggi yillarda aeroportlarni rivojlantirish va yerusti ta’minoti boshqarmasi boshlig‘i lavozimida ishlagan.
U 2023-yilda Uzbekistan Airports ga taklif qilinib, boshqaruv raisining xalqaro tashkilotlar bilan hamkorligi bo‘yicha maslahatchisi lavozimida ishlagan. Keyinchalik Buxoro aeroporti direktori vazifasini vaqtinchalik bajaruvchi etib tayinlangandi.
Eslatib o‘tamiz, 2022-yilning dekabr oyidan beri Shukur G‘oipov O‘zbekiston poytaxti xalqaro aeroportini boshqarib kelayotgandi.
Uzbekistan Airports matbuot xizmati mazkur tayinlovga oid xabarini Telegram dagi kanalidan o‘chirib tashlagan bo‘lib, buning sababi ochiqlanmagan.
Izoh (0)