UNICEF va Vaksina alyansi Gavi O‘zbekiston Sog‘liqni saqlash vazirligiga 3,2 million dollardan ortiq qiymatga ega beg‘araz yordam ko‘rsatilishini eʼlon qildi. Bu haqda UNICEF matbuot xizmati xabar berdi.
Gavi yordami O‘zbekiston bo‘ylab taqdim etilgan uskunalar va chiqindilarni boshqarish resurslarini o‘z ichiga oladi. “Xayriya qilingan 3000 ta planshet va 221 ta haroratni masofadan nazorat qilish tizimidan iborat AT jihozlari O‘zbekistonda immunizatsiya dasturini modernizatsiya qilishda muhim ahamiyat kasb etadi”, — deyiladi xabarda.
Qayd etilishicha, dasturni raqamlashtirish orqali Sog‘liqni saqlash vazirligiga vaksinalar bilan qamrab olishni samarali kuzatish, vaksinalarni yetkazib berish zanjirlarini kuzatish va umumiy immunizatsiya boshqaruvini yaxshilash imkonini beradi.
AT jihozlari bilan bir qatorda, UNICEF va Gavi Andijon, Namangan, Jizzax, Surxondaryo, Sirdaryo viloyatlaridagi 28 ta sog‘liqni saqlash muassasalari, shuningdek, Toshkent shahridagi Respublika shoshilinch tibbiy yordam ilmiy markazini chiqindilarni qayta ishlash uskunalari va yillik xarajat materiallari bilan taʼminlagan. Bundan maqsad mamlakatning sog‘liqni saqlash tizimini mustahkamlash borasidagi saʼy-harakatlarni qo‘llab-quvvatlashdir.
Mazkur yordam immunizatsiya uchun barqaror va adolatli tizimlarni rivojlantirish, sog‘liqni saqlash tizimining mustahkam ishchi kuchini shakllantirish va emlash bo‘yicha aholining ishonchini mustahkamlash bo‘yicha UNICEF va Gavi’ning birgalikdagi saʼy-harakatlari natijasidir.
“Taʼkidlash joizki, 8000 dan ortiq emlash bo‘yicha xodimlar o‘z vaqtida emlash qayd etilgan hujjatlar bilan tanishish va immunizatsiya bilan qamrab olinishi kerak bo‘lgan aholini aniqlash imkoniyatiga ega bo‘ladi. Fursatdan foydalanib, mazkur sohada ishlaydigan barcha hamkorlarni chiqindilarni boshqarish bo‘yicha raqamli va iqlim o‘zgarishlariga chidamli texnologiyalarni joriy etgani va tatbiq qilgani bilan tabriklayman”, — deydi Gavi kompaniyasining O‘zbekistondagi portfeli bo‘yicha katta menejeri Yan Kastilyos Franka.
Emlashning universal qamroviga erishish va har bir bolaning sog‘lom va to‘laqonli hayot kechirish imkoniyatiga ega bo‘lishini taʼminlash yo‘lida UNICEF va Gavi O‘zbekiston Sog‘liqni saqlash vazirligini qo‘llab-quvvatlashga sodiq bo‘lib qolishini ta’kidlagan. Ushbu AT jihozlari va chiqindilarni boshqarish qurilmalarini taqdim etish ularning sog‘liqni saqlash tizimini mustahkamlash va butun dunyo bo‘ylab bolalar uchun muhim vaksinalardan foydalanish imkoniyatini yaxshilash bo‘yicha olib borilayotgan saʼy-harakatlarining bir qismidir.
Avvalroq O‘zbekiston Sog‘liqni saqlash vazirligi 10 ta Airbus vertolyotini sotib olishi mumkinligi to‘g‘risida xabar berilgandi.
Izoh (0)