Oliy Majlis Senatining Yoshlar, madaniyat va sport masalalari qo‘mitasi majlisida “Voyaga yetmaganlar o‘rtasida nazoratsizlik va huquqbuzarliklarning profilaktikasi to‘g‘risida”gi qonunni takomillashtirish yuzasidan fikr bildirildi.
Aytilishicha, mazkur qonunning 12 ta moddasida havolaki normalar mavjudligi aniqlangan.
“Ushbu moddalarda belgilangan normalar amalda tasdiqlangan norma ijodkorligi faoliyati talabga javob bermaydi.
Qonunda voyaga yetmaganlar o‘rtasida nazoratsizlik va huquqbuzarliklarning profilaktikasi bo‘yicha belgilangan chora-tadbirlar sohani samarali tartibga solish imkonini bermayapti.
Huquqni qo‘llash amaliyotidan kelib chiqqan holda asosiy tushunchalar yetarli darajada yoritilmagan”, — deyiladi Senat axborotida.
Alohida ta‘kidlanishicha, o‘ziga nisbatan yakka tartibdagi profilaktika ishi olib boriladigan shaxslarning toifalari qatorini kengaytirish va huquqbuzarliklarga olib kelayotgan yangi holatlarni aks ettirish kerak.
“Ota-onalar yoki ularning o‘rnini bosuvchi shaxslar masʼuliyatini aniq belgilash zarurati mavjud”, deya senatorlar qonunni takomillashtirishga ehtiyoj borligini bildirgan.
Avvalroq Oliy Majlis Senatining Yoshlar, madaniyat va sport masalalari qo‘mitasi majlisida “Voyaga yetmaganlarga nisbatan jinoiy javobgarlik yanada liberallashtirilishi munosabati bilan O‘zbekiston Respublikasining Jinoyat kodeksiga qo‘shimcha va o‘zgartirishlar kiritish to‘g‘risida”gi qonun muhokama qilingandi. Mazkur qonun bilan 18 yoshga to‘lguniga qadar sodir etgan o‘ta og‘ir bo‘lmagan jinoyati uchun jazoni o‘tab bo‘lgan shaxs sudlanmagan deb hisoblanishi belgilanmoqda.
Izoh (0)