Soliq qo‘mitasi vakillari tomonidan tadbirkorlarga onlayn nazorat-kassa uskunalaridan foydalanish hamda mijozlarga xarid cheklarini berish bo‘yicha tushuntirish tadbirlari o‘tkazilmoqda.
Toshkent shahar soliq boshqarmasi boshlig‘i va Chilonzor tumani soliq inspeksiyasi mutaxassislari Chilonzor buyum savdo kompleksida (“Ippodrom”) faoliyat yuritayotgan tadbirkorlar bilan uchrashuv o‘tkazdi. Bu haqda Davlat soliq qo‘mitasi xabar berdi.
Maʼlum qilinishicha, uchrashuvda tovarlar uchun to‘lovlarni bir jismoniy shaxsning kartasidan boshqa jismoniy shaxsning kartasiga o‘tkazish (P2P) orqali hisob-kitob qilish noqonuniy hisoblanishi tushuntirilgan. Shu bilan birga, sotuvchilar mijozlarga QR-kod va fiskal belgili chek taqdim etishlari shartligi, chek bermaslik qonunchilikda belgilangan tartibda javobgarlikka sabab bo‘lishi taʼkidlangan.
Qo‘shimcha qilinishicha, soliq vakillari “Soliqchi–tadbirkorga ko‘makchi” tamoyili asosida har bir savdo shoxobchasiga kirib, tadbirkorlarga to‘g‘ri faoliyat yurgizish lozimligi, onlayn nazorat–kassa texnikalaridan foydalanish va xaridorlarga xarid cheklarini to‘liq chiqarib berish bo‘yicha kerakli ko‘rsatmalar bermoqda. Bu bo‘yicha savdo bilan shug‘ullanuvchilarga eslatma xatlari tarqatilmoqda.
“Uchrashuvda soliqchilarga o‘zimni qiziqtirgan savollarni berdim va javob oldim. Kassa apparatlari baʼzi hollarda ishlamay qoladi. Hozirda bunday uskunalarga masʼul xodimlar savdo markazimizda o‘tiribdi. Ular apparat nosozligini bartaraf qilmoqda”,— deydi tadbirkorlardan biri.
Shu bilan birga, soliqchilar Uchtepa tumani soliq inspeksiyasi mas’ul xodimlari ishtirokida O‘rikzor savdo kompleksida faoliyat yuritadigan tadbirkorlar bilan ham uchrashdi.
Izoh (0)