O‘zbekistonda dronlardan noqonuniy foydalanganlik uchun belgilangan javobgarlik yengillashtirilmoqda. Bu ko‘zda tutilgan qonun loyihasi Parlament quyi palatasidagi XDP fraksiyasining navbatdagi yig‘ilishida muhokama qilindi.
“Bugungi kunda fuqarolar va xorijiy sayyohlar tomonidan uchuvchisiz uchadigan apparatlar olib kelinganda ularga nisbatan jinoyat ishi qo‘zg‘atilishi va protsessual harakatlar amalga oshirilishi, internet tarmog‘ida jamoatchilik tomonidan keskin muhokama va munozaralarga sabab bo‘lib, mamlakatimizning imidjiga salbiy ta’sir ko‘rsatmoqda”, — deb qayd etgan deputatlar.
Vaziyatni “Ayrim toifadagi jinoiy qilmishlar uchun javobgarlik liberallashtirilishi munosabati bilan O‘zbekiston Respublikasining Jinoyat kodeksiga hamda O‘zbekiston Respublikasining Ma’muriy javobgarlik to‘g‘risidagi kodeksiga o‘zgartirish va qo‘shimchalar kiritish haqida”gi qonunni qabul qilish orqali yumshatish rejalashtirilmoqda.
Ushbu hujjat bilan Ma’muriy javobgarlik to‘g‘risidagi kodeks uchuvchisiz uchadigan apparatlarni, ularning butlovchi va ehtiyot qismlarini qonunga xilof ravishda olib kirish, o‘tkazish, olish, saqlash yoki ulardan foydalanish harakatlarini sodir etganlik uchun ma’muriy javobgarlikni nazarda tutuvchi 185-4-modda bilan to‘ldirilmoqda.
Shuningdek, Jinoyat kodeksining 244-4-moddasida belgilangan sanksiyalarga muqobil jarima, axloq tuzatish ishlari, ozodlikni cheklash kabi jazo turlari kiritilyapti.
Qonun loyihasi tashabbuskorlarining aytishicha, loyihaning qabul qilinishi uchuvchisiz uchadigan apparatlarni O‘zbekiston hududiga olib kirish va undan foydalanishning o‘rnatilgan tartib qoidalarini o‘zgartirmagan holda, bugungi kunda jamoatchilikda yuzaga kelayotgan e’tirozli kayfiyatni yumshatish imkoniyatini yaratadi.
Ma’lumot uchun, amaldagi Jinoyat kodeksiga ko‘ra, uchuvchisiz uchadigan apparatlarni, ularning butlovchi va ehtiyot qismlarini qonunga xilof ravishda olib kirish, o‘tkazish, olish, saqlash yoki ulardan foydalanish 3 yilgacha ozodlikdan mahrum qilish bilan jazolanadi.
Izoh (0)