Londonda 11-noyabr kuni falastinliklarni qo‘llab-quvvatlashga qaratilgan marshga 300 mingga yaqin odam to‘plandi, deb xabar beradi BBC.
Ushbu aksiya 11-noyabr — Buyuk Britaniya ishtirokidagi urushlarda halok bo‘lganlarni xotirlash kuniga to‘g‘ri kelgani bois, unga alohida e’tibor qaratildi. G‘azoda tinchlikni o‘rnatishga chaqirgan fuqarolar erta tongdan London markazi Gayd-Parkdan aksiyani boshladi. Marsh tinch o‘tdi, ayrimlar unda o‘z farzandlari bilan ishtirok etdi.
Politsiya marsh o‘tkazilishiga qarshilik bildirgan 100 dan ortiq fuqaroni qo‘lga oldi — ular o‘zini agressiv tutib, politsiya xodimlariga turli buyumlarni uloqtirgan.
Oktyabr oxirlarida ham Londonda 100 mingdan ortiq odam falastinliklarni qo‘llab-quvvatlab ko‘chaga chiqqandi.
7-oktyabrdan buyon G‘azoga berilgan zarbalar oqibatida halok bo‘lganlar soni 11 ming kishidan oshdi, ularning to‘rt mingdan ortig‘i bolalardir. Bundan tashqari, texnikalar yetishmasligi sababli vayronalar ostidan jarohatlanganlarni olib chiqish imkoniyati yo‘q. O‘z navbatida, bu halok bo‘lganlar sonining ortishiga sabab bo‘lishi mumkin.
Izoh (0)