Қозоғистон бош вазири ўринбосари Тамара Дуйсенова Костенко конида ҳалок бўлган кончиларнинг маошини маълум қилди. Бу ҳақда Tengrinews хабар берди.
“Рақамли оила картаси бўйича уларнинг маошлари ҳақидаги маълумотларни кўриб чиқдик. 300 мингдан 1,6 миллион тенгегача (639 доллардан тахминан 3 400 доллардан ортиқ), чунки улар орасида ёш ишчилар, эндигина ишга келганлар ҳам бўлган. Шунинг учун кончилар малакаси ва функсионаллигига қараб маошларда фарқ бор”, — деди Дуйсенова.
У кончиларнинг иш ҳақини ошириш масаласи ҳар йили кўриб чиқилишини таъкидлади.
“Уларнинг коллектив шартномасида иш ҳажмини бажариш учун тегишли қўшимча тўловлар назарда тутилган. Ўтган йилларда бу инфляция даражасида, кейин эса ишлаб чиқариш ҳажмлари нуқтаи назаридан кўриб чиқилди”, — дейди бош вазир ўринбосари.
Қарағанда конидаги портлаш
28-октябрь куни Қарағанда вилоятидаги Костенко конида портлаш содир бўлди. Оқибатда 46 нафар кончи ҳалок бўлди. Воқеа пайтида конда 252 киши бўлган, 205 нафар кончи мустақил равишда ер юзасига чиққан, улардан 18 нафари тиббий ёрдамга мурожаат қилган. Воқеадан кейин мамлакатда мотам эълон қилинди.
Қозоғистонда бахтсиз ҳодисадан сўнг кон ёки қурилиш ишларини олиб боришда хавфсизлик қоидаларини бузиш моддаси бўйича судгача тергов бошланган. Воқеа ҳолатларига ойдинлик киритиш учун ҳукумат комиссияси тузилган.
Бундан ташқари, Қозоғистон президенти Қосим-Жўмарт Тўқаев конга эгалик қилувчи АрcелорМиттал Темиртау (АМТ) компанияси раҳбариятини алмаштирган.
Изоҳ (0)