Бугун, 31 октябрь куни жиноят ишлари бўйича Фарғона туман судида Жиноят кодексининг 139-моддаси (туҳмат) 2-қисми “а”, 3-қисми “а” банди, 140-моддаси (ҳақорат қилиш) 3-қисми “а” банди ва 165-моддаси (товламачилик) 3-қисми “а”, “б” бандларида назарда тутилган жиноятларни содир этганликда айбланаётган Олимжон Ҳайдаров (1989 йилда Россия Федерациясида туғилган, блогер, муқаддам судланмаган)га оид жиноят ишини кўриб чиқиш бўйича очиқ суд жараёни бошланди.
Олий суднинг Жамоатчилик билан алоқалар маркази раҳбари Азиз Абидовнинг маълум қилишича, ушбу жиноят иши жиноят ишлари бўйича Фарғона туман судининг раиси А.Эргашев раислигида кўриб чиқилмоқда.
“Суд мажлиси очиқ деб эълон қилингач, дастлаб судланувчининг ҳимоячиси томонидан суд жараёни мобайнида аудио ва видеоёзувни амалга ошириш ҳақидаги илтимосномаси юзасидан тарафлар фикри тингланди. Жиноят иши доирасидаги жабрланувчиларнинг шахсига доир маълумотлар оммага ошкор этилишини хоҳламаслиги боис илтимосномани рад қилиш ҳақидаги фикрлари инобатга олиниб, суд судланувчининг ҳимоячиси келтирган илтимосномани рад қилиш ҳақида ажрим чиқарди.
Шу ўринда таъкидлаш жоизки, мазкур жиноят иши очиқ суд мажлисида кўрилаётгани боис жамоатчилик ва оммавий ахборот воситалари вакиллари унда кузатувчи сифатида иштирок этишлари мумкин.
Суд жараёни давом этмоқда. Қўшимча маълумот суд жараёни якуни бўйича берилади”, — деб ёзди Азиз Абидов Telegram каналида.
Жорий йилнинг 29 июль куни Фарғона вилояти ҳуқуқ-тартибот органлари томонидан ўтказилган тезкор тадбир жараёнида, ўзини мустақил блогер деб таништирган фуқаро Олимжон Ҳайдаров товламачилик устида қўлга олингани ҳақида хабар берилганди.
“У жорий йилнинг 12 июнь куни ‘Қўқон Истиқлол’ савдо комплексида норасмий савдо фаолияти билан шуғулланган тадбиркорларнинг ишончига кирган. Фуқаро уларда норозилик кайфиятини уйғотиш орқали савдо комплексларидаги реконструкция ишлари бўйича салбий мазмундаги мақолаларни ўзига тегишли ижтимоий тармоқ каналларига жойлаштирган.
Қўшимча равишда, блогер ‘Қўқон Истиқлол’ савдо комплекси МЧЖ расмийларидан товламачилик йўли билан моддий маблағ ундиришга уринган. Ўзи томонидан тайёрланган ‘Қўқонда ҳуқуқий демократик бошқарувми ёки шаръий бошқарувми?’ номли салбий мазмундаги мақолани интернет тармоқларида тарқатмаслик эвазига 10 минг АҚШ долларини товламачилик йўли билан талаб қилган. Блогер умумий қийматда 7,5 минг АҚШ долларни қўлга киритиб, қўшимча 2,500 АҚШ долларини олаётган вақтида тезкор тадбир вакиллари томонидан қўлга олинган”, — дея хабар берган Фарғона ИИБ.
Изоҳ (0)