O‘zbekiston musulmonlari idorasi raisi, muftiy shayx Nuriddin Xoliqnazarov Misrning Qohira shahrida o‘tkazilgan anjumanda ishtirok etdi. Bu haqda idora matbuot xizmati xabar berdi.
Qayd etilishicha, islom olamining yirik ulamo va soha mutaxassislari ishtirokidagi ushbu “Fatvo va barqaror rivojlanish maqsadlari” nomli anjuman 18-oktyabr kuni o‘z ishini boshladi. Unda fatvo va mo‘min-musulmonlar hayotidagi muhim masalalar taniqli ulamolar, muftiylar, din va davlat arboblaridan iborat jami 200 dan ziyod yirik delegatlar tomonidan muhokama qilinmoqda.
Xalqaro konferensiyada Shayx Nuriddin Xoliqnazarov nutq qilib, bugungi tahdidlarning oldini olish uchun bir qator dolzarb takliflarni ilgari surdi. Xususan, axborot zamonidagi g‘oyaviy xurujlar islom olamini tashvishga solayotgani, turli ixtiloflar kelib chiqayotgani, mana shunday muammolarga yechim topishda Fatvo idoralarining o‘rni nihoyatda katta ekani, tinchlik-osoyishtalikni taʼminlash va musulmon ummati hamjihatligiga erishishda fatvoning ahamiyati juda muhim ekanini muftiy hazratlari izohladi. Shuningdek, ushbu yo‘nalishda yuzaga kelayotgan muammolar yetarli ilm va malakaga ega bo‘lmagan shaxslarning fatvo berishi oqibatida kelib chiqayotganini ham qo‘shimcha qildi.
Muftiy hazratlari mana shunday muammolarga yechim topishda islom ilm-maʼrifatga asoslangan mo‘tadil din ekanini targ‘ib qilish, ulamolar hamkorligini mustahkamlash va mo‘min-musulmonlar ehtiyojini taʼminlash kabilar ekanini bayon etdi. Bundan tashqari, Internet va raqamli axborot vositalari orqali adashgan toifalar din niqobi ostida ekstremizm, mazhabsizlik, takfir va mutaassib qarashlar tarqatayotgani xavotirli holat ekanini alohida qayd etdi.
Shayx Nuriddin Xoliqnazarov O‘zbekistonda so‘nggi yillarda diniy-maʼrifiy sohasidagi ijobiy o‘zgarishlar amalga oshirilayotgani, jumladan, jaholatga qarshi kurash ishlari jadal olib borilayotgani, Markaziy Osiyoda yagona bo‘lgan Fatvo markazi samarali faoliyat olib borayotgani kabilarga ham alohida urg‘u qaratdi.
Mazkur arab tilida qilingan nutq va barcha uchun dolzarb ahamiyatga ega bo‘lgan takliflar anjuman ishtirokchilari tomonidan yuqori baholandi.
Izoh (0)