O‘zbekistonga kelgan yana bir sayyoh — turkiyalik fuqaro Toshkent—Andijon poyezdida 100 ming so‘m pora evaziga joyini o‘zgartirganini aytib, tarmoqqa video yukladi. Bu haqda Telegram’dagi Troll.uz kanalida xabar berildi.
Yo tavba, nimalar bo‘lyapti?! Yana bir chet ellik sayyoh “O‘zbekiston temir yo‘llari”ning pok xodimlariga pora berib, ularni sharmanda qilibdi. Aftidan, temiryo‘lchilarni boshidan oxirigacha halollik vaksinasi bilan emlavorish kerak. Yo‘qsa, “to‘xtatinglar, men bu Yangi O‘zbekistondan tushib qolaman”, deyishdan o‘zga chora qolmaydi. Chet ellik turistlarda, — deydi bu haqda fikr bildirgan jurnalist va bloger Muhrim A’zamxo‘jayev.
Qo‘shimcha qilinishicha, pora evaziga joyini o‘zgartirgan sayyoh umrimda birinchi marta pora berganini, bundan o‘zi ham g‘alati bo‘lganini bildirgan.
“Daryo”ning bu haqdagi so‘roviga javob bergan “O‘zbekiston temir yo‘llari” AJ axborot xizmati rahbari Alisher Boltaboyev holat o‘rganilayotganini, tez orada rasmiy ma’lumot berilishini bildirdi.
Avvalroq tarmoqlarda “Afrosiyob”da 10 dollarga sotib olingan biletini ichkarida yana 15 dollar to‘lab, o‘z joyini ekonom klassdan biznes klassga o‘zgartirgan sayyoh videosi tarqalgandi. Holatga munosabat bildirgan “O‘zbekiston temir yo‘llari” axborot xizmati mazkur video eski ekanini, bunday xatoga yo‘l qo‘ygan mas’ul ishdan olinganini ma’lum qildi.
Izoh (0)