“Mazkur holat bo‘yicha poyezd boshlig‘i lavozimidan olingan”. “O‘zbekiston temir yo‘llari” xorijlik sayyohning “Afrosiyob”da korrupsion yo‘l bilan bilet sotib olganiga izoh berdi

Tarmoqlarda “Afrosiyob”da 10 dollarga sotib olingan biletini ichkarida yana 15 dollar to‘lab, o‘z joyini ekonom klassdan biznes klassga o‘zgartirgan sayyoh videosi tarqaldi.

“O‘zbekiston temir yo‘llari” axborot xizmati mazkur video eski ekanini, bunday xatoga yo‘l qo‘ygan mas’ul ishdan olinganini ma’lum qildi.

Ushbu hodisa 2023-yilning 6-iyul kunida bo‘lib o‘tgan. 10-iyul kuni poyezd boshlig‘i mazkur holat bo‘yicha lavozimidan ozod etilgan. Vagon kuzatuvchilari styuardlarga bu kabi hodisalar qaytarilmasligi bo‘yicha tegishli yo‘riqnomalar bilan tushuntirish ishlari olib borilgan. Hozirgi kunda yuqori tezlikda harakatlanuvchi “Afrosiyob” elektropoyezdlarining barchasida ishchi guruh tomonidan tekshiruv amalga oshirilmoqda. Bu kabi holatlar qaytarilmasligi uchun nazorat o‘rnatilgan. Sizlardan eski ma’lumotlarni tarqatmasligingizni so‘raymiz, — deyiladi mas’ullar izohida.

Sentyabr oxirlarida prezident Shavkat Mirziyoyev huzurida temir yo‘l sohasida hal qilinishi lozim bo‘lgan asosiy masalalar yuzasidan yig‘ilish o‘tkazilgandi. O‘shanda “O‘zbekiston temir yo‘llari” xoldingga aylantirilishi, shuningdek, “O‘zbekiston temir yo‘llari”ning nosohaviy aktivlarini sotish vazifasi qo‘yilgani to‘g‘risida xabar berilgandi.