Shavkat Mirziyoyev 13-oktyabr kuni Bishkek shahrida o‘tayotgan MDH sammiti doirasida Belarus prezidenti Aleksandr Lukashenko bilan uchrashuv o‘tkazdi. Bu haqda Prezident matbuot xizmati xabar berdi.
Qayd etilishicha, ikki tomonlama munosabatlarning dolzarb masalalari muhokama qilindi. Yetakchilar O‘zbekiston va Belarus o‘rtasidagi ko‘p qirrali aloqalar jadal rivojlanib borayotganini mamnuniyat bilan qayd etdi.
“O‘zaro tovar ayirboshlash ko‘rsatkichlari o‘smoqda, iqtisodiyotning turli tarmoqlarida kooperatsiya loyihalarini amalga oshirish davom etmoqda. Madaniyat, kinematografiya va sport sohasida qo‘shma tadbirlar muntazam o‘tkazib borilmoqda”, — deyiladi xabarda.
Davlat rahbarlari savdo-iqtisodiy va gumanitar hamkorlikni yanada kengaytirish bo‘yicha o‘zaro muvofiqlashgan choralarni ko‘rish, jumladan, Hukumatlararo komissiyaning navbatdagi yig‘ilishi, Hududlar forumi hamda O‘zbekiston va Belarus yetakchi oliy taʼlim muassasalari rektorlarining uchrashuvini tashkil etish muhimligini qayd etdi.
Shuningdek, MDH va boshqa xalqaro tuzilmalar doirasidagi hamkorlik yuzasidan fikr almashilgan, bo‘lajak tadbirlar rejasi ham ko‘rib chiqilgan.
Avvalroq Shavkat Mirziyoyev MDH sammitida ishtirok etish uchun Bishkekka yetib borgani to‘g‘risida xabar berilgandi. Davlat rahbarlari kengashining navbatdagi majlisi kun tartibidan MDH doirasidagi ko‘p tomonlama hamkorlikni yanada kengaytirish, jumladan, savdo, investitsiyalar, sanoat kooperatsiyasi, innovatsiyalar, raqamlashtirish, transport, taʼlim, madaniyat va boshqa sohalarda qo‘shma dastur va loyihalarni amalga oshirish masalalari o‘rin olgan.
Izoh (0)