Dubayda odam o‘g‘irlashning oldini olishga yordam bergan ayol faxriy yorliq bilan taqdirlandi

Dubay shahrida Nuf Al Mazrui ismli ayol odam o‘g‘irlashning oldini olishga muvaffaq bo‘ldi.

U tushlik tanaffus paytida restoran tashqarisida buyurtmani olib kelishlarini kutib turganda, bir erkakni mashinaga kuch bilan o‘tkazmoqchi bo‘lgan ikki shaxsni ko‘rib qoldi. Nuf Al Mazrui ularga tanbeh bergan, lekin noma’lum shaxslar hammasi joyida ekanligiga ayolni ishontirib, tezda voqea joyini tark etishgan.

Biroq ayol ularga ishonmay, mashinaning davlat raqamini eslab qolib, darhol politsiyaga qo‘ng‘iroq qildi. Bir necha daqiqadan so‘ng Yo‘l-patrul xizmati Dubay ko‘chalarida mazkur mashinani to‘xtatdi: ma’lum bo‘lishicha, jinoyatchilar bir odamni o‘g‘irlab ketishgan va undan pul undirishga harakat qilishgan. Jabrlanuvchi qo‘rqib ketganidan yordam chaqirishga ham urinmagan.

Dubay politsiya bo‘limi rahbari Al Mazruining tezkor harakatlari erkakning hayotini saqlab qolganini qayd etdi.

“Al Mazruining hushyorligi va qat’iyati gumondorlarni qo‘lga olish va jabrlanuvchini qutqarishimizga yordam berdi. Biz amirlik xavfsizligini ta’minlashga qo‘shgan hissasi uchun undan minnatdormiz”, — dedi Dubay politsiyasi general-mayori Abdulla Al Maasam.

Ayol politsiyaga taklif qilinib, hushyorligi uchun minnatdorchilik bildirildi hamda faxriy yorliq bilan taqdirlandi.