Koronavirus pandemiyasidan so‘ng tiklanish dasturlarini moliyalashtirish va Ukrainani qo‘llab-quvvatlash uchun mablag‘larni faol jalb etishi tufayli Yevropa Ittifoqining qarzi uch yil ichida 900 milliard yevroga yetadi. Bu haqda The Financial Times xabar berdi.
Yevropa Ittifoqi rasmiysiga ko‘ra, Bryussel qisqa vaqt ichida qarz bozorlarida “haqiqiy o‘yinchi”ga aylandi. Hozirda uning qarzi 450 milliard yevroni tashkil etadi, bu 2020-yildagidan to‘qqiz baravar ko‘p.
“2026-yil oxiriga kelib, qarz 900 milliard yevroga yetadi”, — deya uning so‘zlarini keltiradi nashr. “Bunday qarz qayta moliyalashni talab qiladi”, — deya qo‘shimcha qildi YI vakili.
Yevropa iqtisodiyotini tiklash va barqaror rivojlanishning keng qamrovli rejasi iqtisodchilarga pandemiya oqibatlaridan xalos bo‘lish va Yevropaning yashil hamda raqamli iqtisodiyotga o‘tish jarayonini tezlashtirishga yordam berishga qaratilgan. Uni amalga oshirish uchun taxminan 800 milliard yevro kerak bo‘ladi.
Majburiyatlarga ko‘ra, Bryussel 2028-yildan boshlab NextGenerationEU dasturi bo‘yicha kreditlarni to‘lashni boshlashi kerak.
Izoh (0)