4-oktyabr kuni Toshkent issiqlik taʼminoti operatori (issiq suv va isitish) Veolia Energy Tashkent kompaniyasi binosida isitish mavsumiga tayyorgarlik ko‘rishga bag‘ishlangan matbuot anjumani bo‘lib o‘tdi.
Matbuot anjumanida Veolia Energy Tashkent kompaniyasining tijorat direktori Maqsud Normetov jurnalistlarning baʼzi savollariga javob berdi.
– Bu yilgi qish mavsumida o‘tgan yilgiga o‘xshab kamchiliklar kuzatilmaydimi?
– Qish mavsumi yakuniga yetganidan keyin barcha kommunal sohada qishga tayyorgarlik jarayoni boshlanadi. Mana hozir shaharning ko‘plab joylarida quvurlarni almashtiryapmiz. Tasarrufimizdagi barcha qozonxonalarni taʼmirlab, qishga tayyor qildik.
Qars ikki qo‘ldan chiqadi. Biz meʼyor bo‘yicha 85 gradusdagi issiqlikni yetkazib beramiz. Mana shu issiqlikni uyning kompaniyasi bizdan olib, isteʼmolchiga yetkazib berishi kerak. Buning uchun isteʼmolchi kompaniyaga pul to‘laydi. Agar gazimiz yaxshi bo‘lib tursa, qozonxonalar 85 gradusdagi issiqlikni chiqarib bera oladi. Hozir ko‘pchilik o‘tgan qish mavsumida yuzaga kelgan holatni gapirmoqda. O‘tgan yili gaz yetishmovchiligi tufayli issiqlik yetkazib bera olmadik. Agar gaz yaxshi bo‘lsa, uylarni issiqlik bilan bemalol taʼminlay olamiz.
– Qish mavsumida uylarda xona harorati necha gradus bo‘lishi kerak?
– Uy ichida harorat 18 gradus bo‘lishi kerak. Bizda o‘zboshimchalik holatlari ko‘p. Shuning hisobiga isitish tizimi o‘zgarib ketgan. Hozir ko‘pchilik uyidagi issiqlik batareyalarini olib tashlagan. Lekin uyning rejasi qilinayotganda hamma narsa hisobga olingan bo‘ladi. Yaʼni bir xona qizimasa, bu yon atrofdagi qo‘shni xonadonlarga ham taʼsir qiladi. Ko‘plab ko‘p qavatli uylarning birinchi qavati do‘kon qilib yuborilgan. Birinchi qavat sovuq bo‘lgani hisobiga tepadagi uylar isimaydi.
— Agar bu yil ham O‘zbekistonda gaz defitsiti yuzaga kelsa, qozonxonalar ishlamay qoladimi?
– Hozir Toshkent shahrida mazutda ishlovchi 4 ta qozonxona mavjud. Agar gaz defitsiti paydo bo‘lsa, bu qozonxonalar mazut yoqib, aholiga issiqlik yetkazib berishi mumkin.
2023-yil may oyida Veolia Energy Tashkent kompaniyasi Bektemir (“Vodnik” qozonxonasi) va Sergeli (“Sanoatenergo” qozonxonasi) tumanlarida zamonaviy qozonxonalar qurishni boshlagan. Qurilish yopiq issiqlik taʼminoti tizimiga o‘tish bo‘yicha pilot loyihasi doirasida amalga oshirilmoqda.
Maʼlumot uchun, yopiq isitish tizimi bilan suv to‘g‘ridan to‘g‘ri issiqlik isteʼmoli joyida, aniqrog‘i obyektning o‘zida isitiladi. Bu ochiq tizimda (issiqlik energiyasini qozonxonadan binoga tashishda) muqarrar ravishda yuzaga keladigan issiqlik energiyasini yo‘qotishining oldini oladi.
Hozirda 2 ta qozonxonaga barcha texnologik uskunalar o‘rnatilib, qurilish ishlari yakunlanmoqda.
Maʼlumotlarga ko‘ra, “Vodnik” qozonxonasiga har biri 10 va 5 MVt quvvatga ega 2 tadan qozonlar o‘rnatilgan. “Sanoatenergo” qozonxonasida esa har biri 6 MVt quvvatga ega 3 ta qozon qurilgan.
Izoh (0)