Toshkent shahar maktabgacha va maktab ta’limi boshqarmasi Yunusobod tumanidagi 260-maktab o‘quvchilari sinfxonalarning biridan chayon topgani aytilgan xabarlarga munosabat bildirdi.
Qayd etilishicha, mazkur holat Toshkent shahar maktabgacha va maktab taʼlimi boshqarmasi Ishchi guruhi tomonidan ahvol o‘rganilgan. Unga ko‘ra, 6-oktyabr kuni 260-maktabda taxminan soat 10:20 larda yuqori sinf o‘quvchilari sinfxonada emas, koridorda jonsiz chayon topib, videotasvirga olgan va ijtimoiy tarmoqqa joylashtirgan.
O‘rganishlar chog‘ida aniqlanishicha, maktabning 9-sinf o‘quvchisi R.A. o‘zi bilan qog‘oz qutida maktabga jonsiz chayon olib kelgan va maktabdoshlariga hazillashish maqsadida chayonni koridorda qoldirgan. Bu xatti-harakati uchun o‘quvchi R.A. bilan tushuntirish ishlari olib borilgan. Shuningdek, bunday hol takrorlanmasligini oldini olish maqsadida maktab o‘quvchilari bilan IIB inspektor-psixologi ishtirokida profilaktik suhbat o‘tkazilgan.
Ta’kidlanishicha, 7-oktyabr kuni Yunusobod tumani Sanitariya-epidemiologiya osoyishtalik markazi mutaxassislari jalb etilib, maktab oshxonasi, sport zali, koridorlar hamda sinfxonalarida turli hashoratlarga qarshi dezinfeksiya va dezinseksiya ishlari amalga oshirilgan.
Avvalroq Toshkentda jismoniy tarbiya darsida 6-sinf o‘quvchisi ko‘kragiga koptok tegishi oqibatida vafot etgani to‘g‘risida xabar berilgandi.
Izoh (0)