Samarqand viloyati Bulung‘ur tumanida 10 tup daraxt kesib tashlangani yuzasidan jinoyat ishi qo‘zg‘atildi. Bu haqda Bosh prokuratura matbuot xizmati xabar berdi.
17-iyun kuni yashil belbog‘ (ihota) shaklida ekilgan 10 ga yaqin qayrag‘och daraxti kesib tashlangandi. O‘zini tanishtirishni istamagan fuqaro hududda qurilish qilishini bildirgan. Daraxtlarni kesish bo‘yicha esa hech bir hujjat taqdim eta olmagan.
Bulung‘ur tumani hududidan o‘tuvchi Toshkent—Samarqand M-39-avtomagistral yo‘li yoqasida ekilgan qariyb 50-55 yillik ushbu daraxtlar kesilgani oqibatida tabiatga 774,6 million so‘m miqdorida zarar yetkazilgan.
O‘tkazilgan tekshirish natijasiga ko‘ra, bir guruh fuqarolar tomonidan 9 tup sog‘lom va 1 tup quvragan qayrag‘och noqonuniy kesib tashlangani yuzasidan fuqaro S.X. va boshqalarga nisbatan Jinoyat kodeksining 198-moddasi 3-qismi (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) bilan jinoyat ishi qo‘zg‘atildi.
Hozirda Bulung‘ur tumani IIB TB tomonidan tergov harakatlari olib borilmoqda.
Izoh (0)