Toshkent metrosida harakat tarkibi 4-oktyabr kuni nosozlik sabab belgilangan vaqtda harakatlana olmadi. Bu haqda Toshkent metropoliteni matbuot xizmati xabar berdi.

Qayd etilishicha, 4-oktyabr sanasida soat taxminan 07:55 lar atrofida Chilonzor yo‘nalishining “Chinor” (5-bekat) bekatidan harakatlanishi lozim bo‘lgan 14-sonli harakat tarkibining tormoz tizimida texnik nosozlik holati kuzatilgan va buning natijasida ushbu harakat tarkibi belgilangan vaqtda harakatlana olmagan.

Yo‘lovchilarga noqulaylik hosil qilmaslik va yo‘nalishda belgilangan harakat jadvali buzilmasligini oldini olish maqsadida, ortidagi yo‘lovchilarsiz bo‘lgan poyezd orqali tirkamaga olinib, harakat tarkibi tekshiruv yo‘lagiga olib borilgan.

Hozirgi vaqtda yo‘nalishdagi barcha poyezdlar belgilangan jadval asosida harakatlanmoqda.

2022-yilda Toshkent metropolitenida kuzatilgan muammolar haqida bir qator xabarlar berilgan edi. Xususan, poyezdlar bir necha bor to‘xtab qolgan, harakat yo‘nalishi cheklangandi. Shuningdek, Toshkent yerusti metrosida yuz bergan qisqa tutashuv yuzasidan rasmiy ma’lumot berilgan, metro poyezdi “Olmazor” bekatida to‘xtab qolgan, metro poyezd nosozlik sabab “Chorsu” bekatida yo‘lovchilarni tushirib qoldirgan edi.