Тошкент метросида ҳаракат таркиби 4 октябр куни носозлик сабаб белгиланган вақтда ҳаракатлана олмади. Бу ҳақда Тошкент метрополитени матбуот хизмати хабар берди.
Қайд этилишича, 4 октябр санасида соат тахминан 07:55 лар атрофида Чилонзор йўналишининг “Чинор” (5-бекат) бекатидан ҳаракатланиши лозим бўлган 14-сонли ҳаракат таркибининг тормоз тизимида техник носозлик ҳолати кузатилган ва бунинг натижасида ушбу ҳаракат таркиби белгиланган вақтда ҳаракатлана олмаган.
Йўловчиларга ноқулайлик ҳосил қилмаслик ва йўналишда белгиланган ҳаракат жадвали бузилмаслигини олдини олиш мақсадида, ортидаги йўловчиларсиз бўлган поезд орқали тиркамага олиниб, ҳаракат таркиби текширув йўлагига олиб борилган.
Ҳозирги вақтда йўналишдаги барча поездлар белгиланган жадвал асосида ҳаракатланмоқда.
2022 йилда Тошкент метрополитенида кузатилган муаммолар ҳақида бир қатор хабарлар берилган эди. Хусусан, поездлар бир неча бор тўхтаб қолган, ҳаракат йўналиши чекланганди. Шунингдек, Тошкент ерусти метросида юз берган қисқа туташув юзасидан расмий маълумот берилган, метро поезди “Олмазор” бекатида тўхтаб қолган, метро поезд носозлик сабаб “Чорсу” бекатида йўловчиларни тушириб қолдирган эди.
Изоҳ (0)