Kiyevda ilk bor YI davlatlari tashqi ishlar vazirlari sammiti bo‘lib o‘tmoqda

Kiyevda 2-oktyabr, dushanba kuni Yevropa Ittifoqiga a’zo barcha 27 davlat tashqi ishlar vazirlari norasmiy sammitga yig‘ildi. Bu Yevropa Ittifoqidan tashqarida bo‘lib o‘tayotgan yuqori darajadagi birinchi shunday uchrashuv.

Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel uchrashuvni “tarixiy” deb atadi va Ukraina Yevropa Ittifoqining bo‘lajak a’zosi ekanini qo‘shimcha qildi.

We are convening a historic meeting of EU Foreign Ministers here in Ukraine, candidate country and future member of the EU.

We are here to express our solidarity and support to the Ukrainian people.https://t.co/zcv6agCcIy

— Josep Borrell Fontelles (@JosepBorrellF) October 2, 2023

Germaniya tashqi ishlar vaziri Annalena Berbok ham Ukraina poytaxtida ekanini Germaniya Tashqi ishlar vazirligi vakillaridan biri 2-oktyabr kuni ertalab jurnalistlar so‘roviga javoban tasdiqladi. 

Reuters xabariga ko‘ra, Kiyevdagi norasmiy sammitda Yevropa Ittifoqining Ukrainani so‘zsiz qo‘llab-quvvatlashini ta’kidlash rejalashtirilgan. Xavfsizlik nuqtayi nazaridan uchrashuv haqida faqat uning boshlanishidan oldin e’lon qilingan. 

Borrel 2-oktyabr kuni Ukraina poytaxtida bo‘lib o‘tadigan sammitda Kiyevning xalqaro maydonda qo‘llab-quvvatlanishini kuchaytirish maqsadida tinchlik rejasi muhokama qilinishi hamda Ukrainada tinchlik o‘rnatish bo‘yicha navbatdagi sammitga tayyorgarlik ko‘rilishini maʼlum qilgan.

Avvalroq Borrel yevropaliklar uchun Ukrainadagi urush “ekzistensial tahdid” ekanini ta’kidlagan.