Xarkovda bolalar raketa tahdidi vaqtida ham o‘qishi uchun ilk yerosti maktabi quriladi

Ukrainaning Xarkov shahri hokimiyati yerosti maktabi qurmoqchi, dedi shahar meri Igor Terexov o‘zining Telegram-kanalida.

“Biz Ukrainada himoya tuzilmalari uchun eng zamonaviy talablarga javob beradigan birinchi yerosti maktabini qurishni rejalashtirmoqdamiz. Bunday boshpana minglab xarkovlik bolalarga raketa tahdidi paytida ham xavfsiz ta’lim olishda davom etish imkonini beradi”, — dedi Terexov.

Shahar rahbari Xarkov hokimiyati ta’limga sarmoya kiritishda davom etishini va “budjet mablag‘lari taqchilligiga qaramay”, 2023—2024-yillarda bu sohaga xarajatlarni kamaytirmasligini ta’kidladi.

Xarkovda 2023-yil sentyabr oyida Rossiya qo‘shinlari tomonidan davomiy hujumlar fonida beshta shahar metro bekatidagi bir nechta xona ikki smenada o‘qiydigan 19 ta maktab o‘quvchilari uchun sinf xonalariga aylantirildi. Xarkov meri Igor Terexov “bu vaqtinchalik chora” ekanini aytdi. Shu bilan birga, Xarkov hukumati shaharning Sanoat tumanida 450 nafar bola o‘qishi mumkin bo‘lgan “maktab bombapanohi” qurilishini e’lon qildi.