Киевда илк бор ЕИ давлатлари ташқи ишлар вазирлари саммити бўлиб ўтмоқда

Киевда 2-октябр, душанба куни Европа Иттифоқига аъзо барча 27 давлат ташқи ишлар вазирлари норасмий саммитга йиғилди. Бу Европа Иттифоқидан ташқарида бўлиб ўтаётган юқори даражадаги биринчи шундай учрашув.

Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел учрашувни “тарихий” деб атади ва Украина Европа Иттифоқининг бўлажак аъзоси эканини қўшимча қилди.

We are convening a historic meeting of EU Foreign Ministers here in Ukraine, candidate country and future member of the EU.

We are here to express our solidarity and support to the Ukrainian people.https://t.co/zcv6agCcIy

— Josep Borrell Fontelles (@JosepBorrellF) October 2, 2023

Германия ташқи ишлар вазири Анналена Бербок ҳам Украина пойтахтида эканини Германия Ташқи ишлар вазирлиги вакилларидан бири 2-октябр куни эрталаб журналистлар сўровига жавобан тасдиқлади. 

Reuters хабарига кўра, Киевдаги норасмий саммитда Европа Иттифоқининг Украинани сўзсиз қўллаб-қувватлашини таъкидлаш режалаштирилган. Хавфсизлик нуқтаи назаридан учрашув ҳақида фақат унинг бошланишидан олдин эълон қилинган. 

Боррел 2-октябр куни Украина пойтахтида бўлиб ўтадиган саммитда Киевнинг халқаро майдонда қўллаб-қувватланишини кучайтириш мақсадида тинчлик режаси муҳокама қилиниши ҳамда Украинада тинчлик ўрнатиш бўйича навбатдаги саммитга тайёргарлик кўрилишини маълум қилган.

Аввалроқ Боррел европаликлар учун Украинадаги уруш “экзистенсиал таҳдид” эканини таъкидлаган.