Soliq qo‘mitasi 2023-yilning sakkiz oyida savdo sohasida eng ko‘p soliq to‘lagan top-20 ta korxona nomini ma’lum qildi.
Qayd etilishicha yanvar—avgust oylarida 150 427 ta yuridik shaxs tomonidan 13,6 trillion so‘m soliq to‘langan. Shundan 1,1 trillion so‘mi, ya’ni 8,3 foizi 20 ta korxona hisobiga to‘g‘ri keladi. Ularning jami tovar aylanmasi 24,1 trillion so‘mni tashkil etgan, qo‘llagan soliq imtiyozlari miqdori esa 437,1 milliard so‘mga yetgan.
Ushbu 20 ta soliq to‘lovchi tomonidan ta’minlangan tushumlar soliq turlari kesimida:
- QQS — 445,6 milliard so‘m;
- foyda solig‘i — 310,4 milliard so‘m;
- JSHODS — 172,4 milliard so‘m;
- ijtimoiy soliq — 71,6 milliard so‘m;
- aksiz solig‘i — 68,5 milliard so‘m;
- mol-mulk solig‘i — 15,9 milliard so‘m;
- yer solig‘i — 8,2 milliard so‘m;
- boshqa soliqlar — 34 milliard so‘m.
18-avgust kuni tadbirkorlar bilan o‘tkazilayotgan ochiq muloqotda Shavkat Mirziyoyev sodda soliq maʼmurchiligi va byurokratiyasiz qulay muhit yaratish borasida muhim tashabbuslarni ilgari surgandi. O‘tkazilgan so‘rovlarda qo‘shilgan qiymat solig‘i to‘lovchilarning 70 foizi ushbu soliqni qaytarishda soliq uzilishi koeffitsiyentini qo‘llash, yaʼni Tax Gap tizimi adolatsiz ekanini bildirgan. Soliq tizimidagi korrupsiya bilan bog‘liq shikoyatlar haddan tashqari ko‘payib ketgani ham aynan Tax Gap bilan bog‘liq.
“Olayotgan oyliklaringni oqlamayapsizlar, xalqqa, tadbirkorga yordam bermayapsizlar, to‘siq bo‘lyapsizlar. Mana, Tax Gap degan balo bularni qanday qiynayapti, korrupsiyaga sabab bo‘layotgani uchun tikka turib qarsak chalyapti”, — degandi prezident Soliq qo‘mitasi raisi Sherzod Kudbiyevga.
Sentyabr boshidan esa O‘zbekiston qo‘shilgan qiymat solig‘ini qoplash (qaytarish)da soliq uzilishi koeffitsiyentini qo‘llash (Tax Gap) amaliyoti taqiqlandi.
Izoh (0)