Bosh vazir Abdulla Aripov kuni kecha yuz bergan favqulodda hodisa yuzasidan Sergeli tumani aholisi bilan uchrashib, ular bilan muloqot qildi.
Muloqot vaqtida fuqarolardan biri davlat rahbari Germaniyadan turib ham ularni unutmaganini aytdi. “Prezident hatto Germaniyadan turib ham bizni unutmadilar, qoyilman”, — dedi u.
Bunga javoban bosh vazir prezident safarda bo‘lsa ham, tumandagi holatdan xabardor bo‘lib turganini bildirdi.
“Germaniyada xizmat safarida bo‘lib, kechasi 1 da hokimga telefon qildilar, menga telefon qildilar. Ertalab 8 da yana telefon qildilar. Prezidentimizga barcha kuchlar jalb qilinganini, 24 soat davomida ishlar tashkil qilinib, kechasi bilan ishlashganini bildirdim. Safarda bo‘lsalar ham, ularning e’tiborlaridan chetda qolmaysizlar, xavotir olmanglar”, — dedi Abdulla Aripov.
Kuni kecha Sergeli tumanida “Quruvchilar” dahasida Inter Logistics MCHJga qarashli omborxonada kuchli portlash va yong‘in yuz bergandi. Sodir bo‘lgan favqulodda hodisani o‘rganish, ko‘rilgan talafotlarni bartaraf etish va jabrlanganlarga yordam ko‘rsatish bo‘yicha Shavkat Mirziyoyev topshirig‘iga asosan hukumat komissiyasi tuzildi.
Davlat rahbarining o‘zi Germaniya kansleri Olaf Shols taklifiga binoan 28-sentyabr kuni tashrif bilan Berlin shahriga jo‘nab ketdi. 29-sentyabr kuni prezident Markaziy Osiyo va Germaniya davlat rahbarlari sammitida ishtirok etadi, Germaniya prezidenti Frank-Valter Shtaynmayer va kansler Olaf Shols bilan muzokaralar o‘tkazadi.
Izoh (0)