28-sentabr kuni tunda Toshkent shahri Sergeli tumanidagi “Quruvchilar” dahasida Inter Logistics MCHJga qarashli omborxonada kuchli portlash sodir bo‘ldi. Bu haqda FVV matbuot xizmati xabar berdi.
Qayd etilishicha, soat 02:43 da yong‘in sodir bo‘layotgani to‘g‘risida FVBga xabar tushgan. Shunga ko‘ra, 16 ta yong‘in-qutqaruv ekipaji va 3 ta avtonarvon soat 02:48 da hodisa ro‘y bergan hududga yetib borgan. Yong‘inni o‘chirish ishlari amalga oshirilmoqda.
Ijtimoiy tarmoqlarda tarqalayotgan videolarda kuchli portlash ovozini eshitish mumkin. Yaqin atrofdagi xonadonlarga zarar yetgan. Savdo va boshqa markazlar jiddiy zarar yetgan. Xonadonlarga tez yordam mashinalari yetib borgan.
FVV hodisa “Samolyot qulashi oqibatida sodir bo‘lgan” mazmunidagi xabarlarni rad etdi. Soat 06:25 holatiga ko‘ra, yong‘inni o‘chirish ishlari davom etmoqda.
“Vaziyat to‘liq nazoratga olingan. Yong‘in soat 05:02 da qurshab olingan. FVV xodimlarining tezkor harakatlari natijasida yong‘in maydoni qisqartirilib borilmoqda. Voqea joyida dastlabki daqiqalardan boshlab FVV rahbariyati hamda kuch va vositalari, shuningdek, tegishli tashkilotlar xodimlari ish olib bormoqda. Yong‘in kelib chiqish sababini aniqlash maqsadida FVVning maxsus laboratoriyasi hodisa joyida ish olib bormoqda. Voqea joyida FVV rahbarligida shtab tashkil etilgan”, — deyiladi xabarda.
Sog‘liqni saqlash vazirlining maʼlum qilishicha, portlash oqibatida jarohatlanganlar Respublika shoshilinch tibbiy yordam ilmiy markazi va uning Toshkent viloyati filialiga olib kelingan.
“Hozirga qadar ular orasida o‘ta og‘ir tan jarohati olganlar yo‘q. Ayni paytda shifokorlar tomonidan jabrlanganlarga barcha kerakli tibbiy yordam ko‘rsatilmoqda”, — deyiladi xabarda.
Davolash muassasalarida tezkor tibbiy yordam ko‘rsatish uchun shifokorlar va barcha zarur dori-darmon zaxirasi yaratilgani taʼkidlandi. Yong‘in oqibatida voqea joyi va uning atrofidagi xonadonlarda jarohatlanganlarga ham shoshilinch tibbiy yordam ko‘rsatilmoqda.
Sergeli tumani Jinoyat qidiruv bo‘limi xodimining “Gazeta.uz”ga maʼlum qilishicha, portlash sabablari hozircha aniqlanmagan. Yong‘in hali ham o‘chirib bo‘lingani yo‘q.
Uzbekistan Airports’ga ko‘ra, Toshkentdagi portlash poytaxt aeroporti faoliyatiga taʼsir qilmagan. Voqea poytaxt aeroporti faoliyatiga taʼsir ko‘rsatmagan, “Toshkent” xalqaro aeroporti cheklovlarsiz odatiy rejimda ishlamoqda.
Hodisa joyida FVVning maxsus laboratoriyasi ish olib bormoqda
Izoh (0)