Yle telekanali Rossiya prezidenti Vladimir Putinning 1990-yillar boshida Finlyandiyada dam olgani aks etgan bir qator videolarni e’lon qildi.

“Videoda Putin Sovet Ittifoqi parchalangan paytda Finlyandiya janubidagi hashamatli villada bo‘sh vaqtini o‘tkazayotgani ko‘rsatilgan. Putin beparvo kiyingan va o‘zini vazmin tutgan”, — deydi jurnalistlar.

Rossiyaning bo‘lajak prezidenti egnida oq mayka va ko‘k Adidas sport shalvari bo‘lgan.

“Uning uzun va hurpaygan sochi bo‘lgan, Rossiya rahbarini hech qachon bunday qiyofada ko‘rishmagan”, — ta’kidladi material mualliflari.

Bu tashrif avval oshkor qilinmagan. Kadrlarni jurnalistlarga taqdim etgan shaxs noma’lum. Voqealar Thomesto Group kompaniyasining Finlyandiya janubi-g‘arbidagi Botniya ko‘rfazidagi Torson orolidagi villasida bo‘lib o‘tadi. Siyosatchilar u yerga oilalari, jumladan Putinning sobiq rafiqasi Lyudmila bilan kelgan.

Birinchi videoda Putin Sankt-Peterburgning o‘sha paytdagi meri Anatoliy Sobchak bilan birga stol tennisi o‘ynamoqda. Yozuvda yana uch kishini ko‘rish mumkin; ulardan ikki nafari tansoqchi bo‘lib, siyosatchilarga qarshi o‘ynamoqda. Ikkinchi videoda baliq ovlash tasvirlari, keyin qirg‘oqqa bog‘langan qayiq va Putin, Sobchak aks etgan. Videoda, shuningdek, ayol (ehtimol Putinning rafiqasi, uning yuzi ko‘rinmaydi) baliq tozalayotgani va bir nechta bolalar ovozi eshitilgan.

Boshqa videolarda ikki tansoqchi va Putinning nishonga zarba berish o‘yini o‘ynayotgani, sakkiz kishi, jumladan Putin va Sobchak bo‘lgan bayram dasturxoni aks etgan. Shuningdek, Putin va Sobchakning rafiqalariga o‘xshash ayollarni ham ko‘rish mumkin.

Sobchakga go‘shtli taom olib kelishadi va Putin: “Mer shunday ovqatlanadi, suyaklarni yutadi”, deb hazil qiladi. Kadrni suratga olgan kishi hazillashib, “600 soniya” kadrni katta pulga sotishi, uni televizorda uzatishlarini aytadi. 

Yle mazkur safar davomida Putin bilan birga bo‘lgan ba’zi odamlar bilan ham gaplashgan. Manbalardan birining aytishicha, hozirgi davlat rahbari o‘shanda “alkogolga juda qattiq turgan va chekmagan”.

• Putin 1996-yilda Moskvaga ko‘chib o‘tgan, u prezident ishlari bo‘yicha direktor o‘rinbosari lavozimini egallagan. Tez orada Sobchak jinoiy javobgarlikka tortilgan, ammo oxir-oqibat unga nisbatan ish to‘xtatildi. U 2000-yilda vafot etgan.