Toshkent viloyati hokimi Zoir Mirzayev Qibray tumani hokimi o‘rinbosarlari, hokimlikning boshqa barcha mutaxassislarini vazifasidan ozod qilgan edi. Viloyat hokimligi axborot xizmatining ma’lum qilishicha, 47 nafar mansabdor o‘rniga yangi rahbarlar tayinlandi.
Keltirilishicha, Qibray tumani hokimligidagi ma’naviy muhit, ijro apparati faoliyatini tubdan yaxshilash maqsadida, kadrlar bilan ishlashning “Qibray tajribasi” joriy qilingan edi. Shunga ko‘ra, deputat, nuroniy va faollardan tarkib topgan maxsus ishchi guruh Qibray tumanida 20 kun mobaynida hokimlik hamda korxona va tashkilotlardagi rahbar xodimlarning faoliyatini to‘liq o‘rganib, lavozimiga “noloyiq” deb topilgan kadrlarni almashtirish to‘g‘risida viloyat hokimligiga tavsiya xatini kiritdi.
Bugungi kunda, 64 nafar tuman hokimligi, korxona va tashkilotlardagi rahbar xodimlardan 47 nafari lavozimidan ozod etilib, ularning o‘rniga yosh, salohiyatli kadrlar tayinlandi. Shuningdek, 17 nafar rahbar kadrlar tuman hokimining kafolati asosida, sinov muddati bilan lavozimida qoldirildi.
Bundan tashqari, tuman hokimligida ishlab kelayotgan 19 nafar rahbar kadrlar egallab turgan lavozimidan ozod qilindi, 10 nafari ish joyida sinov muddati bilan qoldirildi. Ayni kunlarda qolgan lavozimlarga munosib nomzodlar ko‘rib chiqilmoqda. Rahbar kadrlar tarkibining yosh koeffitsiyenti bo‘yicha Qibray tumani bugun viloyatda birinchi o‘ringa chiqdi. Lavozimga tayinlanganlarning 25 nafari 25-35 yoshgacha bo‘lgan kadrlar.
Qayd etilishicha, endigina ish boshlagan kadrlarning qariyb barchasi shu tumanning farzandlari. Viloyat korxona va tashkilotlarida rahbarlik lavozimlarida ishlab kelayotgan 7 nafar kadr Qibrayga ishlash uchun yuborildi.
Shuningdek, tumandagi mavjud 35 ta davlat tashkilotlariga yangi rahbarlar tayinlandi, lavozimiga loyiq bo‘lgan 7 nafar rahbar esa o‘z vazifasida, sinov muddati bilan qoldirildi. Endilikda bu kadrlar Prezident administratsiyasi huzuridagi Davlat xizmatlarini rivojlantirish agentligi orqali Davlat boshqaruvi akademiyasida qisqa muddatli o‘quv kursida tahsil oladilar, boshqaruv tizimining sir-asrorlarini puxta o‘rganadi. O‘qish yakunlari bo‘yicha maxsus testlarni topshiradi. Bu bosqichda ham kadrlar tarkibi yana bir bor qat’iyan elakdan o‘tkaziladi, sinaladi.
Izoh (0)