O‘zbekistonda reklama obyektlarining yarmidan ko‘pi belgilangan talablarga mos emasligi aniqlandi. Bu haqda Raqobatni rivojlantirish va iste’molchilar huquqlarini himoya qilish qo‘mitasi matbuot xizmati ma’lum qildi.
Hukumat qarori bilan O‘zbekistonda 2023-yil 1-dekabrgacha tashqi reklama va axborot obyektlari (konstruksiyalari) xatlovdan o‘tkazilib, ular ustidan doimiy nazorat o‘rnatilishi belgilangandi.
O‘tkazilgan xatlovlar natijasiga ko‘ra respublikadagi mavjud 16 832 ta tashqi reklama va axborot obyektlarining 58,8 foizi — 9 905 tasi (shundan Toshkent shahrida 6 004 ta) belgilangan talablarga mos emasligi ma’lum bo‘lgan. Shundan 3 082 tasi (Toshkent shahrida 2 984 ta) noqonuniy, ya’ni hech qanday hujjatlarsiz joylashtirilgan.
Tashqi reklama obyektlarining 4 646 tasi bo‘yicha ularda aniqlangan kamchiliklarni bartaraf etish va qaror talablariga moslashtirish, yoki ixtiyoriy ravishda demontaj qilish yuzasidan tegishli hokimliklar tomonidan konstruksiya egalariga 1 825 ta ko‘rsatma xatlari kiritilgan.
Shuningdek, Toshkentdagi reklama obyektlarida reklamalarning davlat tilida bo‘lishini ta’minlash yuzasidan jami 745 ta monitoring o‘tkazilgan.
Natijada 159 ta (21,3 foiz) holatda reklamaning, 339 ta holatda (45,5 foiz) peshlavhalarning va 39 ta (5 foiz) holatda boshqa e’lon va matnlarni boshqa tillarda berilgani aniqlangan. 108 ta holatda kamchiliklar ixtiyoriy bartaraf etilib, qolgan kamchiliklar bartaraf etilishi bo‘yicha tegishli ko‘rsatmalar berilgan.
Izoh (0)