Ўзбекистонда реклама объектларининг ярмидан кўпи белгиланган талабларга мос эмаслиги аниқланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси матбуот хизмати маълум қилди.
Ҳукумат қарори билан Ўзбекистонда 2023 йил 1 декабргача ташқи реклама ва ахборот объектлари (конструкциялари) хатловдан ўтказилиб, улар устидан доимий назорат ўрнатилиши белгиланганди.
Ўтказилган хатловлар натижасига кўра республикадаги мавжуд 16 832 та ташқи реклама ва ахборот объектларининг 58,8 фоизи — 9 905 таси (шундан Тошкент шаҳрида 6 004 та) белгиланган талабларга мос эмаслиги маълум бўлган. Шундан 3 082 таси (Тошкент шаҳрида 2 984 та) ноқонуний, яъни ҳеч қандай ҳужжатларсиз жойлаштирилган.
Ташқи реклама объектларининг 4 646 таси бўйича уларда аниқланган камчиликларни бартараф этиш ва қарор талабларига мослаштириш, ёки ихтиёрий равишда демонтаж қилиш юзасидан тегишли ҳокимликлар томонидан конструкция эгаларига 1 825 та кўрсатма хатлари киритилган.
Шунингдек, Тошкентдаги реклама объектларида рекламаларнинг давлат тилида бўлишини таъминлаш юзасидан жами 745 та мониторинг ўтказилган.
Натижада 159 та (21,3 фоиз) ҳолатда рекламанинг, 339 та ҳолатда (45,5 фоиз) пешлавҳаларнинг ва 39 та (5 фоиз) ҳолатда бошқа эълон ва матнларни бошқа тилларда берилгани аниқланган. 108 та ҳолатда камчиликлар ихтиёрий бартараф этилиб, қолган камчиликлар бартараф этилиши бўйича тегишли кўрсатмалар берилган.
Изоҳ (0)