“Yangi O‘zbekiston” bog‘iga olib boruvchi ko‘cha ikki kun kechki soatlarda yopiladi

O‘zbekiston davlat mustaqilligining o‘ttiz ikki yilligi munosabati bilan 31-avgust hamda 1-sentabr kunlari “Yangi O‘zbekiston” bog‘ida bayram tadbiri o‘tkaziladi. Bu haqda poytaxt IIBB YHXB axborot xizmati xabar berdi.

 

 

Shu sababli poytaxtning Mahtumquli—Ohangaron shohko‘chasidan, Yangi O‘zbekiston—4P12 yo‘li kesishgan chorrahasigacha soat 19:00 dan 22:00 gacha bo‘lgan vaqt oralig‘ida avtotransport vositalarining harakati vaqtinchalik cheklanadi.

Qayd etilishicha, faqatgina bayram tadbirlari va mushakbozlikka tashrif buyuruvchi mehmonlar Yangi O‘zbekiston ko‘chasi bo‘ylab harakatlanishlari mumkin.

• Toshkent viloyati tomondan — Yuqori Chirchiq, Quyi Chirchiq, O‘rta Chirchiq tumanlari hamda Parkent tumanidan tashrif buyuruvchi mehmonlar 4R12 yo‘li bo‘ylab Sharq YPX maskani orqali poytaxtga kirishlari tavsiya etiladi.
• Bo‘stonliq, G‘azalkent va Qibray tumanlaridan tashrif buyuruvchi mehmonlar Chirchiq shahri orqali Yuzrobod ko‘chasi bo‘ylab Temur Malik ko‘chasi orqali poytaxtimizga kirishlari tavsiya etiladi.

Avvalroq Toshkentda Mustaqillik bayramiga bag‘ishlangan xalqaro ommaviy yugurish musobaqasi sabab ayrim ko‘chalar yopilishi to‘g‘risida xabar berilgandi.