“Mo‘jizakor ayol” — Gal Gadot ishlaydigan onalarning oiladagi qiyinchiliklari haqida o‘z hayoti misolida gapirib berdi

Gal Gadot uchun ma’buda rolini o‘ynash onalik kabi katta quvonch emas. Garchi u ekranda Mo‘jizakor ayol bo‘lsa-da, hayotda karyera va oila o‘rtasidagi muvozanatni topish har doim ham oson bo‘lmagan.

Gal Gadot karyerasi boshlanishidan oldin oila qurganidan xursand

Gadot har doim yosh ona bo‘lishni xohlagan. Shu bilan birga, u karyerasini mustahkamlaganidan keyingina farzand ko‘rish haqida ham jiddiy o‘ylardi. Biroq aktrisa muvaffaqiyatga erishgan paytda farzandli bo‘lsa, unda yanada ko‘p ishlashi kerakligini tushundi, ya’ni bunday holatda bolalariga vaqt ajratolmaydi. Shuning uchun u 25 yoshida to‘ng‘ich qizini dunyoga keltirdi.

Hozir Gal Gadot 37 yoshda, uning 3 nafar qizi bor va u baxtli ayol.

Men ona bo‘lganimdan xursandman. Farzand tarbiyalay boshlashingiz bilan aqlbovar qilmaydigan sevgi va baxtni his qilar ekansiz. Hayotda boshqa hech narsa sizga bunday tuyg‘uni berolmaydi.

Uning uchun eng katta qiyinchilik — oila va ish o‘rtasidagi muvozanatni topish

Galning so‘zlariga ko‘ra, ishlaydigan har bir ona bir vaqtning o‘zida 2 joyda bo‘lish oson emasligini biladi. U uy ishlariga ulgurmagani yoki ishiga yetarlicha e’tibor bermagani uchunmi, ko‘pincha o‘zini aybdor his qiladi.

Ammo yaqinda aktrisa aybdorlikdan qanday qutulish haqida o‘z fikrlari bilan o‘rtoqlashdi.

Nima bo‘lsa ham bolalar hayotingizning bir qismiga aylanadi. Ularga moslashish uchun butunlay o‘zgarishingiz shart emas. Albatta, bolalar har doim birinchi o‘rinda turadi. Lekin men shuni tushundimki, sizda boshqa odamlar kabi odatdagi kundalik tartibingiz bo‘lmasa ham bu normal holat. Butun oila birga bo‘lsa va siz baxtli bo‘lsangiz — eng muhimi shu.

Gal haqiqatan ham bolalariga o‘rnak bo‘lishni xohlaydi, eri bu borada uni to‘liq qo‘llab-quvvatlaydi

Birinchi qizi Alma 2 yoshga to‘lganida Galning ishi tufayli oila tez-tez bir joydan ikkinchi joyga ko‘chishga majbur bo‘lganidan juda xavotirda edi. Biroq eri Galni qo‘llab-quvvatladi va unga: “Qizimizga qanday o‘rnak bo‘lishni xohlayotganingni o‘ylab ko‘r. Agar unga orzulari uchun harakat qilish kerakligini ko‘rsatmoqchi bo‘lsang, unda hammasini to‘g‘ri qilyapsan. Ko‘chish muammolari bilan esa o‘zim shug‘ullanaman”, — deb taskin bergan.

Aynan shu narsa aktrisaga qaror qabul qilishiga yordam beradi. Gal har doim yangi rol tanlasa, bu film qizlariga nimanidir o‘rgatishi mumkinmi, deb o‘zidan so‘raydi. Yoki shunchaki ularga onalari o‘zi sevadigan ishini qilayotganini ko‘rsatish uchun. Shu yo‘l bilan aktrisa qizlariga har kim o‘zi yoqtirgan ishni muvaffaqiyatli bajarishi va ayni paytda oila bilan birga bo‘lish mumkinligini o‘rgatadi.

Gal eri Yaron Versanosiz hech narsa qila olmasligini tan oladi. Intervyulardan birida eridan xotinidagi qaysi odatni ko‘proq sevishini so‘rashadi. Uning javobi juda ta’sirli edi: “Bizning bir tekis bo‘lmagan hayotimizda Gal ish va uy o‘rtasidagi muvozanatni saqlab qoladi. Rafiqamning bularning barchasiga qanday ulgurishi va shunda ham oddiy ayol bo‘lib qolishi meni hayratda qoldiradi”.

Filmda superqahramon rolini ijro etgan Gal Gadot farzandli bo‘lgan o‘sha lahzalarda o‘zini haqiqiy Mo‘jizakor ayoldek his qilgan

Tug‘uruqdan keyin o‘zimni ma’buda kabi his qilaman. Hammasi amalga oshganiga ishonolmayman. Men tug‘ishni yaxshi ko‘raman, iloji bo‘lganda har hafta tug‘ardim. Bu axir mo‘jiza-ku.

Aktrisa unga doimo epidural anesteziya berilishini, shuning uchun tug‘uruq jarayoni unchalik og‘riqli bo‘lmasligini tushuntiradi.

Garchi aktrisa farzand dunyoga keltirishni yaxshi ko‘rsa ham, homiladorligi oson o‘tmaydi: uning ko‘ngli aynib, bosh og‘rig‘idan azob chekadi, sog‘lig‘i sezilarli darajada yomonlashadi.

U qilgan eng jasoratli ishi homiladorligida rol o‘ynash edi

Suratga olish maydonchasida xuddi havo sharidek uchaman. Imkon qadar balandroq uchib, havo oqimlarini ushlashga harakat qilaman. Ammo uyga qaytganimdan so‘ng, ona sifatidagi asosiy faoliyatim boshlanadi. Mayani cho‘mtirishim, Almani ovqatlantirishim va Daniellani uxlatishim kerak. Men qiladigan eng qiyin ish shu — oilaviy hayot va aktrisalik o‘rtasida hammasiga ulgurish.

Gal ona bo‘lishni yaxshi ko‘rsa-da, ba’zida 3 farzandni tarbiyalash juda qiyin bo‘lishini tan oladi. Aktrisa uchun esa eng qiyini — farzandlari mustaqil bo‘lganlarida ularni qanday qilib qo‘yib yuborishni tushunishdir.

Galning fikricha, bolalar unga oddiy odam bo‘lib qolishga yordam beradi

Bilaman, bu shunchaki gapdek tuyuladi, lekin barcha onalar aslida Mo‘jizakor ayol. Bolalarni kinodagi roling yoki mavqeying qiziqtirmaydi. Ular: To‘g‘ri, siz mo‘jizakor ayolsiz, lekin kechki ovqatga nima yeymiz?, deb turishadi”.

Gal Gadot uchun mashhur bo‘lish tartibli bo‘lish demakdir, ona bo‘lish esa hatto juda charchagan paytingda ham erta tongda uyg‘onishni anglatadi.

Men bolam kasal bo‘lganida tuni bilan uxlamasligim mumkin, lekin 5 yoshli qizim meni erta tongda uyg‘otadi — u bilan birga “Shlyapa kiygan mushuk”ni tomosha qilishim kerak. Qanday qilib eng oddiy narsalar meni bunchalik xursand qilishiga hayronman.

Mavzuga doir:

• Gollivud yulduzi Sandra Bullok vaqtinchalik tanaffusga chiqqanini e’lon qildi — 57 yoshli aktrisa 49 ta filmda ajoyib obrazlar yaratgan
• Filmning suratga olish jarayonida homiladorligini mohirlik bilan yashirgan aktrisalar (foto)
• Farzandidan ayrilgan, 3 soat uxlagan, hojatxonada farroshlik qilgan: muvaffaqiyatga erishish yo‘lida turli qiyinchiliklardan o‘tgan yulduzlar (foto)