O‘zbekistonda tadbirkorlik qilish murakkabmi yoki oson? Soliq, litsenziyalash, bank va boshqa sohalar tadbirkorga qanchalik ko‘makdosh? Shu va boshqa savollarga javob olish maqsadida “Daryo” muxbiri “Shuhrat” medali sohibasi, tadbirkor Nigora Murotova bilan suhbatlashdi.
Nigora opa, 20-avgust – Tadbirkorlar kuni munosabati bilan “Shuhrat” medali bilan taqdirlandingiz. Albatta, bu faoliyatingizda yaxshi natijalar ko‘pligidan darak beradi. Dastlab nega tadbirkorlik sohasini tanlaganingiz va faoliyatingiz qanday boshlangani haqida gapirsangiz?
Shu yil Tadbirkorlar kuniga ayol tadbirkorlar qatorida 44 ta taqdirlanganlar ichida mening ham ism-sharifim bo‘lishi juda quvonarli. Nafaqat men uchun, balki jamoam, oilam uchun ham. Ish faoliyatimiz boshlanganiga 6 yil bo‘ldi va hozirda o‘rta biznes vakilimiz.
Tadbirkorligim yoshligimdan boshlangan. Asli kasbim shifokor, xotin-qizlar ginekologiman. Ilmiy ish ham qilganman. Har doim qo‘shimcha manba hisoblab tadbirkorlik bilan shug‘ullanib kelaman. Aytmoqchimanki, xususiy tibbiy klinikalarni ochish birdaniga bo‘lib qolmagan. Kichik biznesdan o‘rta biznesga o‘tish jarayoni 20–25 yil davom etgan.
Klinikamiz “Nikamed” 2017-yil aprelda faoliyat boshladi. Albatta, boshlanishida oson bo‘lmagan, ancha qiyinchiliklarni boshdan o‘tkazdik.
Klinikamiz kichik litsenziya va 36 ta yotoqxonasi bilan ochilgan. Prezidentimiz Yashnobod tumaniga tashrif buyurganlarida tuman aholisini ijtimoiy-iqtisodiy holatini yaxshilash dasturiga biz ham kiritilib, dastur doirasida 1 milliard so‘m imtiyozli kredit olganmiz.
Shifoxona ochishdan asosiy maqsadim O‘zbekiston fuqarolarini sog‘lomlashtirish, ularda kasalini davolashdan avval profilaktik ishlar olib borish, yaʼni kasallikning oldini olishdan iborat. Fuqarolari umri uzoq bo‘lgan davlatlar qatorida O‘zbekistonni ham ko‘rishni istayman. Dunyoda aholisining o‘rta umr ko‘rish yoshi bo‘yicha reyting bor. Afsuski, biz unda ancha orqadamiz. Chunki biz davolaymiz, lekin kasallikning oldini oladigan profilaktik chora-tadbirlarni esa juda kam ko‘ramiz.
Hozirda klinikamizning ikkita filiali bo‘lib, ularda 150–160 nafar xodim ishlaydi. Yana 2 ta filial ochishga harakat qilyapmiz.
Tadbirkorning o‘y-xayoli faqat rivojlanishda bo‘lishi kerak. Agar u ertaga menga tekshiruv keladi, soliq nima bo‘ldi deb, qo‘rqib yashasa, hech qachon o‘sa olmaydi. Bizga prezident “orqangizda men turibman”, deb aytdilar. “Ikkita ish o‘rni yaratgan tadbirkorni yelkamda ko‘taraman”, dedilar. Bu gaplarni eshitgach, ruhlanib, albatta o‘sasiz.
O‘zbekistonda biznes qilish qanchalik murakkab yoki oson? Soliq, bank, litsenziyalash va boshqa sohalar vakillari tadbirkorlar bilan doimiy muloqotda bo‘ladi. Ularning faoliyatiga qanday baho berasiz?
So‘nggi vaqtlarda soliq tizimida ham, bank tizimida ham, sanoat palatasida ham tadbirkorlar uchun ko‘p imkoniyatlar yaratildi. Ular yuqoridan pastga tushib, seni muammoying nima, qanday qiyinchiliklaring bor, deb so‘raganlarining o‘zida hukumatga ishonch yanada oshib, motivatsiya oldik.
Bugun loyihaviy takliflarni oldim. Davlat tadbirkorlarga loyihalarni beryapti. “Mana ol, 60 gektargacha loyihaning krediti, moliyalashtirilishi, biznes rejasi”, deb beryapti. Oling, qiling. Yo‘l yopiq emas, ochiq. Faqat ishlash kerak. Ozgina bilimimizni oshirishimiz lozim. Qaysi sohada bo‘lishidan qatʼi nazar, hamma o‘z ustida ishlashi kerak.
Hozirda Tojikiston va Qozog‘istonning minglab fuqarolari chegaradan o‘tib, kelib bizda davolanmoqda. Masalan, klinikamizda 64 ta koyka bo‘lsa, 30 foizi Tojikiston hamda Qozog‘iston fuqarolari. Nima uchun? Tojikiston yoki Qozog‘istonda shifoxonalar yo‘qmi? Bor. Lekin bizda shifokorlar malakaliroq, ko‘proq o‘z ustimizda ishlaymiz. Yevropa, jahon mamlakatlari standartlariga yaqinlashishga harakat qilamiz. Aytmoqchimanki, biz o‘sha darajaga yetdik. Chunki men o‘zim Hindiston, Xitoy, Amerika, Yevropa davlatlaridagi xususiy tibbiyot klinikalariga borib kelaman. Biz allaqachon o‘sha darajaga yetib keldik. O‘zbekistonga dunyo standartlariga javob beradigan uskunalarni olib kiryapmiz.
2020-yil mart oyida O‘zbekistonga koronavirus kirib kelishi, pandemiya davri ko‘p tadbirkorlar faoliyatiga jiddiy taʼsir qildi. O‘sha paytda eslaymizki, mamlakatda ilk koronavirus sizda aniqlangandi. Shundan so‘ng ayrim yurtdoshlarimiz sizga nisbatan tanqidiy fikrlar bildirgan. Hattoki koronavirus O‘zbekistonda tarqalishiga sizni sababchi qilib ko‘rsatmoqchi bo‘lganlar ham topilardi. Sizga atrofda ko‘p bosimlar bo‘lgani haqida eshitganmiz. Shunday og‘ir bosimlarni qanday yengib o‘tdingiz, pandemiya faoliyatingizga qanday taʼsir qildi?
Inson hayotda ko‘p sinovlarga duch keladi. Qiyinchiliklarni boshdan o‘tkazadi. Bu sinovlar albatta unga tayyor bo‘lgan, u sinovlardan o‘ta oladigan insonlarga berilarkan. Bu haqda eslashni ham, gapirishni ham xohlamayman. Lekin bir gapni aytmoqchiman, qalbimizda borini “kommentariy”da ko‘rsatamiz, qalbimizda borini insonlarga tarqatamiz. Qalbimizda samimiyat, oqko‘ngillik bo‘lsa, biz atrofimizdagilarga shu energiyani beramiz. Qalbimizda kirlik, manmansirash va kibr bo‘lsa, kimdir yiqilgan davrda uni tepkilaymiz, ustidan kulamiz. Internetda tanqidiy yozilgan fikrlar yonida, dalda beradigan gaplar aytgan tanish va notanish insonlarning ko‘pligi menga kuch berdi.
O‘shanda faoliyatimizni 52 kundan keyin boshladik. U paytda bizning davlatga yordamimiz kerak edi. Koronavirus o‘sha yili yozda avjiga chiqqandi. Biz hech qanaqa gina-kudurat qilmasdan, o‘zimizda kuch topib fuqarolarimizga juda ham ko‘p yordam berdik. O‘sha paytda bemorlarni “koridorlar”gacha yotqizishga majbur bo‘lganmiz. Yotoqlarimiz shu darajada to‘lib ketgandi. Chunki bizdan Sog‘liqni saqlash vazirligi tomonidan iltimos qilingandi. Davlat kasalxonalari bu “nagruzka”ni ko‘tara olmayotgandi, shuning uchun xususiy sektorga ham bemorlarni davolash imkoniyati berilgan. Shu fursatdan foydalanib jamoamiz shifokorlariga rahmat aytaman. Ularning sinovli kunlarda qo‘llaganini qadrlayman.
Izoh (0)