Xorijiy tillarni mukammal bilish insonga yangi imkoniyatlarni taqdim etadi. Shuningdek, yaxshi ish topish uchun ham eng kamida bitta chet tilini bilish talab etiladi. O‘zbekistonlik san’atkorlar orasida ham bir nechta tilni yaxshi biladiganlari talaygina. Quyida ana shunday san’atkorlar haqida so‘z boradi.
Munojot Yo‘lchiyeva
O‘zbekiston Qahramoni Munojot Yo‘lchiyeva rus, ingliz va fransuz tilida gaplasha oladi, fors tilida esa qisman muloqot qiladi.
“Ruscha va fransuzchani o‘quvchilik davrimda o‘rganganman. Fransuz tiliga qiziqishim balandligi uchun sinfdoshlarim orasida yaxshi o‘qishga qattiq intilardim. Hatto kelajakda tarjimon bo‘lishni ham orzu qilganman.
Ingliz tilini katta farzandimning maktabda bu fandan qanday bahoga o‘qiyotgani, qay darajada bilishini nazorat qilish maqsadida birgalikda o‘rganganman. Kunora uyimizga repetitor kelib, o‘g‘lim ikkimizga mashg‘ulotlar o‘tardi.
Fors tilini talabalik yillari o‘rganishga majbur bo‘lganman. Bu til g‘azallarni tahlil qilishda katta ahamiyatga ega. Fors tilidagi matnlarni o‘qib, tushuna olaman. Ammo forscha muloqot qilishga biroz qiynalaman.
Vaqt tomonlama imkoniyatim bo‘lganida, rus, ingliz va fors tillaridagi bilimlarimni yanada mustahkamlagan bo‘lardim. Kundalik hayotda asosan, o‘zbek tilida gaplashib, eshitganim uchun mazkur tillardagi ayrim so‘zlar yodimdan chiqib qoladi. Amaliyot, jonli muloqot davomida odamning til borasidagi bilimi, tajribasi shakllanib borishiga amin bo‘ldim”, — deydi Munojot Yo‘lchiyeva.
Yulduz Usmonova
O‘zbekiston xalq artisti Yulduz Usmonova rus, ingliz, turk va tojik tillarida erkin so‘zlasha oladi. Bir muddat Turkiyada yashab, ijod qilgan san’atkor ayni paytda arab tili bo‘yicha bilimlarini mustahkamlamoqda.
Ozodbek Nazarbekov
Madaniyat vaziri Ozodbek Nazarbekov rus va turk tillarida tarjimonsiz gaplashadi. Kasb taqozosi sabab xorij tillarini o‘zlashtirishga majbur bo‘lgan. “Ingliz tilini o‘rganish rejamda bor”, — deydi san’atkor.
Ozoda Nursaidova
O‘z repertuarini bir qancha chet tilidagi qo‘shiqlar bilan ham boyitgan xonanda Ozoda Nursaidova to‘rtta tilda bemalol gaplashadi.
“Avvallari til o‘rganishga qiziqishim kuchli edi. Ishtiyoq, qunt va harakatim sabab rus, ingliz, turk hamda fors tillarida tarjimonsiz gaplashadigan bo‘ldim. Arab tilini esa qisman bilaman. Lekin bu tilni ham puxta o‘rganish maqsadim yo‘q emas. Vaqt jihatidan muammo bo‘lmaganida, fransuz tilini o‘rganardim”, — dedi Ozoda Nursaidova.
Sevara Nazarxon
O‘zbekistonda xizmat ko‘rsatgan artist Sevara Nazarxonni ham poliglot san’atkorlar safiga qo‘shish mumkin. Oilasi bilan Londonda yashaydigan xonanda rus, ingliz hamda fransuz tillarida bemalol muloqot qiladi.
Otabek Mahkamov
Ayni paytda Amerikada yashab, faoliyat yuritayotgan serqirra inson: yurist, aktyor va boshlovchi Otabek Mahkamov o‘quvchilik davrida uchta tilni puxta o‘rganganini ta’kidlaydi.
“Jahon tillari gimnaziyasida o‘qigan davrimda rus, ingliz va fransuz tillarini yaxshi o‘zlashtirganman. Keyinchalik fors, turk, arab va nemis tillarida oz bo‘lsa-da, gaplashishni o‘rgandim. Hozirgi kunda ispan tili bo‘yicha bilimlarimni oshiryapman.
Imkon bo‘lib qolsa, yapon, xitoy va dunyoning eng noan’anaviy tillaridan biri hisoblangan Amazoniyaning piraxan tilini o‘rgangan bo‘lardim”, — dedi Otabek Mahkamov.
Uning aytishicha, u jahon adabiyoti namunalarini original tilda o‘qish, kinolarni tarjimasiz ko‘rish, sevimli xorij qo‘shiqlarining ma’nosini tushunish maqsadida chet tillarini o‘rganishga qaror qilgan.
Munisa Rizayeva
Xonanda Munisa Rizayeva to‘rtta: rus, ingliz, fransuz va ispan tillarida erkin muloqot qilishini qayd etdi. Tojik tilida so‘zlashishga biroz qiynaladi.
O‘n yilcha Londonda yashab, Angliya davlat konservatoriyasi hamda Mehmonxona tijorati va turizm yo‘nalishida tahsil olgan ijodkor yana ikkita tilni o‘rganish niyati borligini aytdi.
“Vaqt topib, arab va xitoy tillarini o‘rganish rejamda bor. Bu ikki til har doim ommaviy muloqot vositasi hisoblangan. Shuningdek, Qur’oni Karimni ham, albatta, o‘rganmoqchiman”, — deydi qo‘shiqchi.
Nilufar Usmonova
Ustazoda san’atkor Nilufar Usmonova ham uchta: rus, ingliz va turk tillarida erkin gaplashadi. Bolaligida ma’lum vaqt Angliyada tahsil olgan xonanda til o‘rganishga juda qiziqadi. U hozirda koreys tilini o‘rganmoqda.
Alixan
O‘n yildan ortiq vaqt okean ortida yashab, hatto Gollivud filmlarida rol o‘ynagan aktyor Alixanning ta’kidlashicha, chet tilini bilgan odamning imkoniyatlari ancha kengayadi.
“Rus tilini bolaligimda, ingliz tilini AQSHda yashagan davrimda o‘rganganman. Aslida, Amerikaga borishimga ingliz tilini o‘rganish orzum ham bir sabab bo‘lgan. ‘Mendirman Jaloliddin’ serialining suratga olish jarayoni tufayli salkam bir yil Turkiyada yashadik va turkcha o‘rganishga majbur bo‘ldik. Hozir turk tilida ham erkin gaplashaman.
Ingliz tilini bilganim uchun Xitoyga borsam ham, Dubayda ham muloqotga kirishishga qiynalmayman. Til bilgan odam hech narsa yutqazmaydi, balki ko‘plab imkoniyatlarni qo‘lga kiritadi.
Vaqtim bo‘lganida, fransuz va ispan tillarini o‘rganardim. Bu ikki til menga yoqadi va juda qiziqarli”, — dedi Alixan.
Shahzoda Matchonova
Kitobxon aktrisa sifatida ko‘pchilikka tanish Shahzoda Matchonova rus, ingliz va turk tillarini biladi. Qayd etish kerakki, u Instagram sahifasidagi postlarining aksariyatini rus tilida yozadi.
Izoh (0)