“Baxt ovchisi” serialidagi Zulya Bositovna roli bilan tomoshabinlarga yaxshi tanish bo‘lgan aktrisa Barchin G‘ofurova bu rolga nima sababdan rozi bo‘lgani va suratga olish ishlari yakunlanmay onasining og‘ir xastalikka chalingani haqida so‘zlab berdi.
— “Baxt ovchisi” filmiga taklif etishgan paytda moliyaviy jihatdan qiynalayotgan paytlarimiz edi. Sovitkichning ichi bo‘sh, hatto yeyishga nonimiz bo‘lmagan paytda serialdan taklif tushdi. Onam bilan maslahatlashganimda ssenariyni o‘qib “Ikkinchi xotin mavzusi ekan, nima qilasan endi. Tanlagan kasbing shu, rozi bo‘laver”, degan.
Filmning birinchi mavsumi uchun kunlik gonorarim 233 ming so‘m etib belgilangan. Ular bir oydan keyin gonorarimni ko‘tarishga va’da berishgan edi, ammo turli sabablarga ko‘ra bu amalga oshmadi. Kam pul berishsa ham rolimni yaxshi ko‘rganim uchun biror marta bundan noliganim yo‘q. To‘qqiz oy davomida bir oiladek bo‘lib ishladik. Vaqti kelsa, syomka uchun obyektlar topishga yoki rolga mos aktrisalarni tanlashga ham yordamlashdim.
Serialning birinchi mavsumi eng yuqori reytingni zabt etdi. Uning muvaffaqiyatidan xursand bo‘lib yurganimda onamning birdan tobi qochib kasalxonaga tushib qoldi. Onamga qo‘yilgan saraton tashxisi meni shok holatga tushirdi. Shifokorlar zudlik bilan kimyoterapiya muolajalarini boshlash kerakligini aytishdi. Uning bari katta mablag‘ni talab etardi.
Shu bois ikkinchi mavsumda kunlik gonorarni 100 AQSH dollari qilishlarini so‘radim. Boshqa payt bo‘lsa unday qilmasdim, ammo onam va ukam kasal bo‘lib davolanayotganida 233 ming so‘m gonorarga ishlay olmasdim. Albatta, bu talabim hech kimga yoqmadi. Tanilib bo‘lgandan keyin atayin, deganlar ham bo‘ldi. Hatto meni roldan chetlashtirib, yangi aktrisalar uchun kasting ham e’lon qilishdi. Ammo kanal rahbarlaridan biri bo‘lgan Sardor Komilov “Agar Barchinning rolini boshqa aktrisa ijro etadigan bo‘lsa, shuncha qilgan syomkalaring uchun haq to‘lamaymiz”, debdi. Shunday keyingina men bilan munosabatlarni tiklashga harakat qilishdi. Ammo ancha vaqtgacha rejissor va ba’zi insonlar sovuq munosabatda bo‘lishdi, — deydi aktrisa Barchin G‘ofurova.
Aktrisa otasi bilan bugungi munosabati va ismini o‘zgartirishiga nimalar sabab bo‘lgani haqida aytib o‘tdi.
— O‘n to‘rt yoshimdan keyin dadamni ko‘rmaganman. Bir necha marta aloqalarni tiklashga harakat qildim. Ammo u inson munosabatlarni tiklashga harakat qilmagan. Intervyularning birida dadam haqida gapirganimdan keyin dadamning boshqa turmushidan bo‘lgan farzandlari Instagram orqali aloqaga chiqishdi. Ammo negadir yozgim kelmadi.
Ilgari ismim Umida bo‘lgan, keyin uni Barchinga o‘zgartirishga qaror qilganman. Bu ism menga qandaydir kuch bag‘ishlaydi. Balki ismimni o‘zgartirganim sabab meni tanimagandir, — deydi Barchin G‘ofurova.
Izoh (0)